بیبیاں پاک دامن: نذرانے میں لاکھوں روپے کی خردبرد، 4 اوقاف اہلکاروں کیخلاف کاروائی

لاہور (صدائے سچ نیوز) مالی بے ضابطگیوں اور بدعنوانی کی روک تھام کے لیے پنجاب اوقاف ڈیپارٹمنٹ نے حضرت بی بی پاک دامن (س) کے دربار پر تعینات سابق چار اہلکاروں کے خلاف سخت تادیبی کارروائی کرتے ہوئے عطیات (نذرانہ) میں خوردبرد کے جرم پر سزائیں عائد کر دی ہیں۔

اوقاف بورڈ کی ہدایت پر شروع کی گئی انکوائری میں یہ ثابت ہوا کہ دربار میں عطیات میں مبینہ طور پر خوردبرد کی گئی، جس سے زائرین کے اعتماد کو شدید نقصان پہنچا۔

سیکرٹری اوقاف ڈاکٹر احسان بھٹہ جو چیف ایڈمنسٹریٹر اوقاف بھی ہیں نے پنجاب ایمپلائز ایفیشنسی، ڈسپلن اینڈ اکاؤنٹیبلٹی (پیڈا) ایکٹ 2006 کے تحت سزاؤں کے احکامات جاری کیے۔

حکم نامے کے مطابق سابق منیجر دربار زاہد اقبال کو میجر پنالٹی دیتے ہوئے ان کی سابقہ پانچ سالہ سروس ضبط کر لی گئی جبکہ ان سے 53 لاکھ 83 ہزار روپے کی ریکوری کا بھی حکم دیا گیا ہے۔ ان پر یہ رقم مبینہ سنگین غفلت، غیر معمولی آمدن کے رجحانات اور ریکارڈ شدہ معائنے نہ کرنے کے باعث مالی نقصان کے طور پر عائد کی گئی ہے۔

اسی طرح سابق سینئر کلرک/اکاؤنٹنٹ امتیاز حسین کومائنر پنالٹی دیتے ہوئے تین سال تک سالانہ انکریمنٹ روکنے کی سزا دی گئی ہے۔ ان پر ریکارڈ کی نامکمل دیکھ بھال، کیش بُکس میں خامیاں، سپروائزر کے دستخطوں کی عدم موجودگی اور آمدن میں بے ضابطگیوں کی رپورٹ نہ کرنے جیسے الزامات ثابت ہوئے۔

دوسری جانب سابق گیٹ کیپر محسن شاہ اور سابق نگہبان ظفر اقبال کے خلاف مالی بدعنوانی کے الزامات قانونی طور پر ثابت نہیں ہو سکے۔

تاہم ترجمان اوقاف کے مطابق تمام متعلقہ افراد کے سروس ریکارڈ میں انتظامی پابندیاں درج کر دی گئی ہیں، جس کے تحت انہیں مستقبل میں کسی بھی کیش سے متعلق پوسٹنگ، عطیات جمع کرنے یا فیلڈ ریونیو پوسٹنگ پر مستقل پابندی عائد کر دی گئی ہے۔