پاکستانی طلباء کے برطانوی ویزوں میں تاخیر، اعظم نذیر تارڑ کا معاملہ برطانوی ہائی کمشنر کے سامنے اٹھا دیا

اسلام آباد (صداۓ سچ نیوز) وفاقی وزیر برائے قانون و انصاف سینیٹر اعظم نذیر تارڑ سے برطانوی ہائی کمشنر جین میریٹ نے ملاقات کی۔ ملاقات میں پاکستان اور برطانیہ کے دوطرفہ تعلقات، باہمی دلچسپی کے امور اور دونوں ممالک کے درمیان تعاون کو مزید مضبوط بنانے کے حوالے سے تبادلہ خیال کیا گیا۔

وفاقی وزیر نے ملاقات کے دوران پاکستانی طلباء کے برطانیہ کے ویزوں میں تاخیر کا معاملہ اٹھاتے ہوئے اس حوالے سے حکومتی تشویش سے برطانوی ہائی کمشنر کو آگاہ کیا۔

سینیٹر اعظم نذیر تارڑ نے کہا کہ سینکڑوں پاکستانی طلباء ویزوں میں تاخیر کے باعث پریشانی کا شکار ہیں اور اس تاخیر کے باعث ان کا تعلیمی سال ضائع ہونے کا خدشہ ہے۔ انہوں نے کہا کہ پاکستانی طلباء کے لیے بیرون ملک تعلیم کے حصول میں حائل رکاوٹیں دور کرنا اور انہیں سہولیات فراہم کرنا ضروری ہے۔

وفاقی وزیر نے برطانوی ہائی کمشنر کو بتایا کہ وزیراعظم کی ہدایت پر بیرون ملک زیرِ تعلیم پاکستانی طلباء سے متعلق قانونی و ادارہ جاتی فریم ورک میں بہتری کے لیے ان کی سربراہی میں ایک کمیٹی کام کر رہی ہے۔

انہوں نے بتایا کہ وزیراعظم کی ہدایت پر کمیٹی نے اس معاملے پر اپنی سفارشات مرتب کر لی ہیں اور پاکستانی طلباء کے بیرون ملک تعلیم کے لیے قانونی و ادارہ جاتی فریم ورک کو مزید مؤثر بنانے کے لیے اقدامات جاری ہیں۔

وفاقی وزیر نے کہا کہ پاکستانی طلباء کے بیرون ملک تعلیم کے لیے قانونی و ادارہ جاتی فریم ورک کو بہتر بنایا جا رہا ہے تاکہ طلباء کو درپیش مسائل کے حل کے لیے مؤثر نظام وضع کیا جا سکے۔

برطانوی ہائی کمشنر جین میریٹ نے پاکستانی طلباء کے ویزوں میں تاخیر کے معاملے کو حل کرنے کی یقین دہانی کرائی۔

ملاقات میں پاکستان اور برطانیہ کے درمیان تعلیمی روابط کو مزید مضبوط بنانے کے ساتھ ساتھ دونوں ممالک کے درمیان ادارہ جاتی روابط اور تعاون کو مزید مستحکم بنانے پر بھی اظہار خیال کیا گیا۔

ملاقات میں وزیر مملکت برائے قانون، انصاف و انسانی حقوق بیرسٹر عقیل ملک بھی موجود تھے۔