باہمی مذہبی ہم آہنگی ملکی ترقی کے لیئے انتہائی ضروری ہے، منور علی مہیسر

کراچی (اسٹاف رپورٹر) صوبائی سیکریٹری منور علی مہیسر نے کہا ہے کہ باہمی مذہبی ہم آہنگی ہی ملکی ترقی کو آگے بڑھانے میں مددگار ثابت ہو سکتی ہے اور ہمارا مذہب بھی ہمیں یہی کچھ سکھاتا ہے۔ ان خیالات کا اظہار انہوں نے سالانہ بین الاقوامی معصومہ سندھ امن و بین المذاہب ہم آہنگی کانفرنس کے موقع پر خطاب کرتے ہوئے کیا۔

اس کانفرنس کا اہتمام زائرین خدمت کمیٹی اگھم کوٹ سندھ اور کراچی ایڈیٹرز کلب کی جانب سے سندھ بوائز اسکاؤٹس آڈیٹوریم میں کیا گیا تھا۔ کانفرنس میں مختلف مذاہب سے تعلق رکھنے والے ممتاز علماء اور اسکالرز نے امن، رواداری اور باہمی احترام کے موضوعات پر خطاب کیا۔

مہمان خصوصی کی حیثیت سے خطاب کرتے ہوئے منور علی مہیسر نے کہا کہ اسلام ہمیں انسانیت کی خدمت اور محبت کا درس دیتا ہے، ہمارا فرض ہے کہ ہم اپنے حقوق پورے کریں۔

سالانہ بین الاقوامی معصومہء سندھ امن و بین المذاہب ہم آہنگی کانفرنس 23 دسمبر کو کراچی میں منعقد ہوگی

انہوں نے کہا کہ، زوار عبدالستار درس اس وقت جو مذہبی خدمات سرانجام دے رہے ہیں، انہیں اس کا اجر مل رہا ہے اور ملتا رہے گا۔ اس تقریب میں لوگ نہیں بیٹھے بلکہ میں تو یہ کہوں گا کہ ادارے بیٹھے ہیں جس کی وجہ سے اس محفل کی رونق دوبالا ہوگئی ہے۔

بی بی ماہم ؑ کے مزار کی تعمیر میں شرپسند عناصر رکاوٹ ڈالنے سے باز نہ آئے تو کراچی پریس کلب کے باہر علامتی ہڑتال کی جائے گی، زوار درس

انہوں نے کہا کہ یہ بین الاقوامی کانفرنس ہے، یہ ان ہستیوں کے نام سے منائی جارہی ہے جنہوں نے نہ صرف خود بلکہ ان کے آباؤ و اجداد نے حق و صداقت کے لیئے عظیم قربانیاں دیں اور آج انہی قربانیوں کے نتیجے میں اسلام کا بول بالا ہے۔

انہوں نے کہا کہ مجھے بہت خوشی ہوتی ہےکہ، یہ تقریب ہر سال اسی شایانِ شان طریقے سے منائی جا رہی ہے اور اس میں زوارعبدالستار درس، نیاز حسین لغاری، مبشر میر اور منظر نقوی بدستور بڑھ چڑھ کر حصہ لیتے ہیں۔ سیدہ خدیجہ بی بی ماہم ؑ سندھ دھرتی کے لیئے مشعل راہ کی حیثیت رکھتی ہیں۔

انہوں نے اپنے خاندان کی طرح کس قدر پریشانیاں و مصائب برداشت کیئے ہونگے جب وہ سرزمینِ عرب سے سندھ کی دھرتی تک پہنچی ہونگی۔ ممتاز اسکالر، ادیب و صحافی زوار عبدالستار درس نے خطاب کرتے ہوئے کہا کہ میں ہمیشہ وہ کہتا ہوں جو میرا ضمیر کہتا ہے، چاہے کسی کو میری بات پسند آئے یا نہیں، میں تو حق و صداقت کی بات کرتا رہوں گا۔

انہوں نے کہا کہ اسلام کے ابتدائی اہم ترین احکامات ہی اسلام کی اصل روح ہیں، ہمیں ان احکامات کوسمجھنے کی ضرورت ہے۔

سالانہ بین الاقوامی معصومہ سندھ امن و بین المذاہب ہم آہنگی کانفرنس سے مبشر میر، بریگیڈیئر (ر) کرار حسین عابدی، نیاز حسین لغاری، پنڈت مکیش کمار، بشپ نذیر عالم، مرزا اشتیاق بیگ، منظر نقوی و دیگر کا خطاب

ان احکامات کی روشنی میں یہی کہوں گا کہ انسان بنیادی طور پر آزاد ہے، آزادی اس کا بنیادی حق ہے، اسلام کہتا ہے کہ کسی طاقتور کو کمزور پر، امیر کو غریب پر، گورے کو کالے پر کوئی فوقیت حاصل نہیں، فوقیت صرف تقویٰ اور کردار پر منحصر ہے۔

انہوں نے کہا کہ ہمیں قرآنِ حکیم سے احکامات ملتے ہیں اور حدیث رسول صہ سے ان کی مکمل تشریح حاصل ہوتی ہے، انہوں نے کہا کہ سندھ میں اہل بیت عہ کی آمد کا سلسلہ بہت قدیم ہے، سندھ میں اس وقت خاندانِ رسالت صہ کی جو اہم شخصیات تشریف لائیں ان میں جناب سیدہ خدیجہ بی بی ماہم ؑ بھی شامل تھیں۔

انہوں نے کہا کہ بی بی ماہم ؑکے روضہ مبارک کے لیئے کافی عرصہ سے بشارات لوگوں کو ہو رہی تھیں جس پر لوگوں نے شہادتیں دیں کہ اس اس طرح بشارات ہو رہی ہیں۔ آج ہم ان کے روزے کی تعمیر میں حصہ لے رہے ہیں لیکن اس وقت محکمہء اوقاف کے کچھ لوگ تعمیراتی کام میں رکاوٹیں ڈال رہے ہیں جس کے ہمارے پاس ثبوت بھی موجود ہیں۔

اگر محکمہء اوقاف سندھ و دیگر متعلقہ اداروں نے ان مسائل کو حل کرنے کے لیئے اقدامات نہیں کیئے تو ہم جلد کراچی پریس کلب کے باہر علامتی ہڑتال شروع کریں گے اور طویل عرصہ تک بھوک ہڑتال پربھی بیٹھیں گے۔ بعد ازاں تقریب میں سینئر صحافی اور روزنامہ جنگ کے سابق ایڈیٹر نذیر لغاری اور زوار عبدالستار درس کی دو کتابوں کی رونمائی ہوئی۔

قبل ازیں تقریب سے مسلم لیگی رہنما مرزا اشتیاق بیگ، کراچی ایڈیٹرز کلب کے صدر مبشر میر، نیاز حسین لغاری، سبطین نقوی،پنڈت مکیش کمار، بریگیڈیئر (ر) کرار حسین عابدی، بشپ نذیر عالم سمیت دیگر نے خطاب کیا، جبکہ بڑی تعداد میں خواتین و حضرات نے کانفرنس شرکت کی۔ کراچی ایڈیٹرز کلب کے سیکریٹری جنرل سید منظر نقوی نے مہمانوں کا شکریہ ادا کیا۔