فوجی سازوسامان کی تیاری کیلئے استعمال ہونے والی تنصیبات دشمن سے مکمل طور پر پوشیدہ ہیں: ایرانی کمانڈر

تہران (صدائے سچ نیوز) ایران کے خاتم الانبیاء سینٹرل ہیڈکوارٹر کے ڈپٹی انسپکٹر نے امریکی دعوؤں کو مسترد کرتے ہوئے کہا ہے کہ ایران کی دفاعی صلاحیتیں کمزور نہیں ہوئیں اور فوجی سازوسامان کی تیاری کے لیے استعمال ہونے والی تنصیبات دشمن سے مکمل طور پر پوشیدہ ہیں۔

ایرانی خبررساں ایجنسی سے گفتگو کرتے ہوئے بریگیڈیئر جنرل محمد جعفر اسدی نے کہا کہ ملک کی دفاعی پیداوار قابل قبول سطح پر برقرار ہے۔

انہوں نے مغربی میڈیا اور امریکی حکام کی جانب سے ایران کی دفاعی صلاحیتوں کو کمزور قرار دینے کے حالیہ دعوؤں پر ردعمل دیتے ہوئے کہا کہ ’ہم بارہا کہہ چکے ہیں کہ ہم نے ابھی تک اپنے تمام کارڈز ظاہر نہیں کیے، ہمارے پاس اب بھی بہت سی ایسی صلاحیتیں موجود ہیں جنہیں ضرورت پڑنے پر استعمال کیا جائے گا‘۔

ایران کی دفاعی صنعت کی صورتحال پر بات کرتے ہوئے جنرل اسدی نے کہا کہ اس وقت فوجی سازوسامان تیار کرنے اور مسلح افواج کی معاونت کے لیے استعمال ہونے والے مقامات مکمل طور پر دشمن سے چھپے ہوئے ہیں اور اسے ان کے مقام کے بارے میں کوئی معلومات نہیں، لہٰذا ہماری دفاعی پیداوار کی صورتحال تسلی بخش ہے۔