اسلام آباد میں ایران امریکا مذاکرات کا طریقہ کار کیا ہوگا؟ اہم تفصیلات

اسلام آباد (صداۓ سچ نیوز) اسلام آباد میں ایران امریکا مذاکرات کا طریقہ کار کیا ہوگا؟ اہم تفصیلات سامنے آگئیں۔

سرکاری ذرائع کا کہنا ہے کہ ایرانی وفد آج رات اسلام آباد پہنچے گا، ایرانی وفد پہلے مرحلے میں پاکستانی میزبانوں سے الگ ملاقات کرے گا۔

امریکی وفد دو حصوں میں پاکستان آئے گا، پہلے مرحلے میں اسٹیو وٹکوف اور جیرڈ کُشنر، پھر نائب صدر جے ڈی وینس آئیں گے۔

ذرائع کا کہنا ہے کہ امریکا اور ایران کے وفود کا ابتدائی طور پر آمنا سامنا نہیں کروایا جائے گا، میزبانوں سے الگ الگ ملاقاتوں کے بعد دونوں وفود کی ملاقات متوقع ہے۔

خیال رہے کہ اس سے قبل وزیرِاعظم شہباز شریف نے ایران اور امریکا کے درمیان ہونے والے مذاکرات کے مقام کا دورہ کیا اور وینیو کے سیکیورٹی انتظامات کا جائزہ لیا، وزارتِ داخلہ اور دیگر سیکیورٹی حکام بھی وزیرِ اعظم شہباز شریف کے ہمراہ تھے۔

یاد رہے کہ امریکی صدر ڈونلڈ ٹرمپ نے وزیرِ اعظم شہباز شریف کی جانب سے کی جانے والی 2 ہفتے کی جنگ بندی کی درخواست کو قبول کی تھی، جس کے بعد اسلام آباد میں ایران اور امریکا کے مذاکرات ہونے جارہے ہیں۔