معرکۂ حق بنیان مرصوص نے ثابت کردیا پاکستان ناقابلِ تسخیر ریاست ہے، نصراللہ خان

راولپنڈی(صدائے سچ نیوز) معرکہ حق بنیان مرصوص کی تاریخی فتح نے دنیا پر واضح کر دیا کہ پاکستان ایک ناقابل تسخیر ریاست ہے۔

معرکۂ حق میں افواجِ پاکستان نے اپنی بہادری، شجاعت اور بصیرت سے دنیا بھر میں پاکستان کا نام روشن کیا اور بھارتی جارحیت کے دوران افواجِ پاکستان وطن عزیز کے دفاع میں بنیان مرصوص (سیسہ پلائی دیوار) بن کر کھڑے ہوئے،جس پر بطور قوم ہمیں فخر ہے۔ پوری قوم شہدا پاکستان اور افواج پاکستان کی لازوال قربانیوں کو سلام پیش کرتی ہے۔

ان خیالات کا اظہار پاک فوج لورز کےصوبائی صدر نصراللہ خان نے پاک فوج لورز کی طرف سے منعقدہ ریلی سے خطاب کرتے ہوئے کیا۔

اس موقع پر انھوں نے کہا کہ فیلڈ مارشل جنرل حافظ سید عاصم منیر کی قیادت میں پاک افواج نے دشمن کو گھٹنے ٹیکنے پر مجبور کرکے اس کے غرور کو خاک میں ملا دیا۔پاکستان عالم اسلام کا مضبوط قلعہ ہے اور اس کا دفاع ہر آنے والے دن کے ساتھ مزید مضبوط ہو رہا ہے۔ پوری قوم کو اپنی قیادت اور افواج پاکستان پر فخر ہے جنہوں نے وطن عزیز کو ناقابل تسخیر بنا دیا۔

یہ بھی پڑھیں: برطانیہ کے مقامی انتخابات، 7 مئی — ایک خاموش سیاسی زلزلہ

پاک فوج لورز کےصوبائی صدر نصراللہ خان نے ریلی سے خطاب کرتے ہوئے کہا کہ معرکہ حق بنیان مرصوص کی فتح اتحاد، ایمان، نظم و ضبط اور قومی یکجہتی کا ثمر ہے اور پاکستان کی بقا اور ترقی کی ضمانت ہیں۔پوری قوم افواج پاکستان کے شانہ بشانہ کھڑی ہے۔ پاکستان کے خلاف ہر سازش کو اتحاد و اتفاق کی قوت سے ناکام بنایا جائے گا اور مودی کا ناپاک ایجنڈا کبھی کامیاب نہیں ہونے دیا جائے گا۔

ریلی میں تمام شرکاء نے ہاتھوں میں ہاتھ ڈال کر افواج پاکستان کے ساتھ بھرپور اظہاریکجہتی کی، سبز ہلالی پرچم لہرا کر وطن سے محبت کا اظہار کیا اور ”پاکستان زندہ باد“، ”افواج پاکستان پائندہ باد“ اور ”اسلام زندہ باد“ کے فلک شگاف نعرے لگائے ۔

آخر میں ضلعی صدر پاک فوج لورز راجہ تنویر کوثر نے ملکی سلامتی، ترقی و خوشحالی، استحکام پاکستان، عالم اسلام کے اتحاد، بھارت کے غیر قانونی زیر تسلط جموں و کشمیر و غزہ فلسطین کی آزادی اور ایران کے مسلمانوں کیلئے خصوصی دعا بھی کی۔