وزیراعظم شہباز شریف کا کرم میں 31 دہشتگردوں کی ہلاکت پر سیکیورٹی فورسز کو خراج تحسین

اسلام آباد (صداۓ سچ نیوز) وزیراعظم شہباز شریف نے جمعہ کے روز کوئٹہ ضلع کے علاقے کرم میں انٹیلی جنس بنیادوں پر کیے گئے آپریشن کے دوران بھارت کے حمایت یافتہ فتنۃ الخوارج اور فتنۃ الہندوستان کے 31 دہشتگردوں کو ہلاک کرنے پر سیکیورٹی فورسز کے افسران اور اہلکاروں کو خراج تحسین پیش کیا۔

وزیراعظم نے اپنے بیان میں سیکیورٹی فورسز کی پیشہ ورانہ مہارت اور بہادری کو سراہتے ہوئے کہا کہ آپریشن کے دوران دہشتگردوں کے متعدد ٹھکانوں کو مؤثر انداز میں تباہ کیا گیا جبکہ اسلحے، گولہ بارود اور دھماکا خیز مواد کی بڑی مقدار بھی برآمد کی گئی۔

انہوں نے کہا کہ سیکیورٹی فورسز ملک دشمن عناصر کے مذموم عزائم ناکام بنانے کے لیے دن رات مصروف عمل ہیں۔

وزیراعظم شہباز شریف نے اس عزم کا اعادہ کیا کہ قومی ایکشن پلان (این اے پی) کے تحت بیرونی سرپرستی میں ہونے والی دہشتگردی کے خلاف جنگ پوری قوت سے جاری رہے گی، یہاں تک کہ ملک سے اس کا مکمل خاتمہ ہو جائے۔