پاکستان، ترکیہ اور سعودی عرب کا دفاعی معاہدے کا امکان، دستخط آج متوقع

پاکستان، ترکیہ اور سعودی عرب کا مشترکہ دفاعی معاہدے کا امکان ہے۔ مشترکہ دفاعی معاہدے پر آج دستخط متوقع ہے۔

 خبرایجنسی کے مطابق مشترکہ دفاعی معاہدے پر جمعے کو یعنی آج دستخط متوقع ہیں کیونکہ ترک صدر رجب طیب اردوان آج ہی سعودی عرب پہنچ رہے ہیں جبکہ وزیراعظم شہبازشریف اور فیلڈ مارشل سید عاصم منیر ہائی لیول وفد کے ہمراہ پہلے ہی سعودی عرب میں موجود ہیں۔

رپورٹ کے مطابق پاکستان، سعودی عرب اور ترکیہ نے دفاعی تعاون بڑھانے کا عزم ظاہر کیا ہے ۔ تینوں ممالک کے درمیان دفاعی شراکت داری پر بات چیت جاری ہے اور اِسی سلسلے میں تینوں ملکوں کے درمیان مشترکہ ڈیفنس ایگریمنٹ بھی سائن ہونے جارہا ہے۔

یاد رہے کہ پاکستان اور سعودی عرب کے درمیان اسٹریٹجک معاہدہ ہوچکا ہے جبکہ کویت بھی حال ہی میں پاکستان کے ساتھ دفاعی معاہدہ کرچکا ہے۔

سعودی عرب میں آج لگنے والی بڑی بیٹھک میں علاقائی صورتحال سمیت ایران جنگ کے خاتمے اور بحری راستوں کی سلامتی و دفاع سے متعلق اہم معاملات پر بڑے فیصلے متوقع ہیں۔

امریکی ٹی وی نے دعویٰ کیا ہے کہ صدر ڈونلڈ ٹرمپ بھی آج سعودی ولی عہد محمد بن سلمان سے ٹیلیفونک رابطہ کریں گے، جس میں مشرق وسطیٰ سے متعلق اہم امور پر تبادلہ خیال کیا جائے گا۔