پاکستان کا مالی خسارہ 22 سال کی کم ترین سطح پر آگیا،اعلامیہ وزارت خزانہ

وفاقی وزارت خزانہ کا کہنا ہے کہ پاکستان کا مالی خسارہ 22 سال کی کم ترین سطح پر آگیا ہے۔

وزارت خزانہ کے جاری اعلامیے میں کہا گیا ہے کہ پاکستان کا پرائمری سرپلس 26 سال کی بلند ترین سطح پر پہنچ گیا ہے، مالی سال 26-2025 میں مالی خسارہ جی ڈی پی کے 2.6 فیصد رہا جبکہ پرائمری سرپلس مالی سال 26-2025 میں جی ڈی پی کا 2.9 فیصد رہا، مسلسل 3 سال پرائمری سرپلس ریکارڈ کیا گیا ہے۔  

اعلامیے کے مطابق مالی سال 26-2025 میں محصولات 19 ہزار 800 ارب روپے رہے، محصولات میں 14 ہزار 800 ارب روپے ٹیکس آمدنی رہی، سود کی مد میں ادائیگیاں کم ہوکر 6 ہزار 950 ارب روپے پر آگئی ہیں، اس سے پہلے سال سود کی مد میں ادائیگی کا حجم 8 ہزار 900 ارب روپے تھا۔

وزارت خزانہ کا بتانا ہے کہ گزشتہ سال دفاعی اخراجات 18فیصد اضافے سے 2588 ارب رہے، سبسڈیز 22 فیصد کمی سے 1300ارب کے مقابلے میں ایک ہزار ایک ارب رہیں جبکہ ترقیاتی اخراجات 786 ارب سے کم ہو کر 727 ارب ریکارڈ کیے گئے۔