وزیراعظم کا ہر شہری کو اپنا گھر دینے کا عزم، اہم ہدایات جاری کر دیں

اسلام آباد (صداۓ سچ نیوز) وزیراعظم شہباز شریف نے کہا ہے کہ اپنا گھر ہر شہری کا حق ہے، اس حوالے سے آسان شرائط پر قرضوں کی فراہمی حکومت کی اولین ترجیح ہے۔

وزیرِ اعظم شہباز شریف کی زیر صدارت رہائشی شعبے میں سرمایہ کاری کے فروغ، کم لاگت گھروں کی فراہمی اور روزگار کے مواقع بڑھانے سے متعلق اہم اجلاس منعقد ہوا۔

اجلاس سے خطاب کرتے ہوئے وزیرِ اعظم نے کہا کہ اپنا گھر ہر شہری کا حق ہے اور آسان شرائط پر قرضوں کی فراہمی حکومت کی اولین ترجیح ہے۔ انہوں نے کہا کہ پاکستان کے رہائشی شعبے میں سرمایہ کاری کی وسیع گنجائش موجود ہے اور اس سے بھرپور فائدہ اٹھانے کیلئے تمام رکاوٹیں دور کی جائیں گی۔

وزیرِ اعظم نے ہدایت کی کہ بیرونی سرمایہ کاروں اور سمندر پار پاکستانیوں کی سرمایہ کاری کے تحفظ کو یقینی بنایا جائے جبکہ تعمیرات کے شعبے میں سرمایہ کاری کے فروغ سے معیشت مستحکم اور لاکھوں روزگار کے مواقع پیدا ہوں گے۔

اجلاس میں متعلقہ حکام کو ہدایت دی گئی کہ تعمیرات و رہائشی شعبے میں سرمایہ کاری بڑھانے کیلئے قابلِ عمل حکمت عملی تیار کر کے اس پر عملدرآمد یقینی بنایا جائے، اس حکمت عملی میں پبلک اور پرائیویٹ سیکٹر کے تمام سٹیک ہولڈرز، صوبائی حکومتوں، آزاد کشمیر اور گلگت بلتستان کو شامل کرنے کی بھی تاکید کی گئی۔

اجلاس کو تعمیرات و رہائشی شعبے پر قائم ٹاسک فورس اور ورکنگ گروپس کی تجاویز پر بریفنگ دی گئی جبکہ منظور شدہ اقدامات پر پیش رفت سے بھی آگاہ کیا گیا۔ بریفنگ میں بتایا گیا کہ بیرونی سرمایہ کاروں اور اوورسیز پاکستانیوں کیلئے خصوصی سہولیات دی جا رہی ہیں، جس سے رہائشی منصوبوں میں اضافہ، معاشی سرگرمیوں کا فروغ اور روزگار کے مواقع پیدا ہوں گے۔

مزید کہا گیا کہ شعبے میں قانونی اصلاحات تیزی سے جاری ہیں اور قانون سازی حتمی مراحل میں ہے، کم لاگت رہائشی منصوبوں کیلئے قرضوں کا نظام نافذ کیا جا چکا ہے جبکہ آئندہ مرحلے میں بینکوں کو اہداف دیے جائیں گے۔ ملک میں مارگیج فنانس کے مکمل نظام اور ڈویلپر لیڈ فنانسنگ کے جامع ماڈل پر بھی کام تیزی سے جاری ہے۔

وزیرِ اعظم نے ہدایت کی کہ رہائشی تعمیرات کے شعبے کی ترقی کیلئے تمام اقدامات کو جلد حتمی شکل دے کر مؤثر عملدرآمد یقینی بنایا جائے۔