وزیر اعظم کا دورہ امام بارگاہ، شہدا کے لواحقین اور زخمیوں کیلئے امدادکا اعلان

اسلام آباد (صداۓ سچ نیوز) وزیر اعظم شہباز شریف نے وفاقی دارالحکومت میں امام بارگاہ دھماکے میں جاں بحق افراد کے لواحقین اور زخمیوں کے لیے امداد کا اعلان کر دیا۔

وزیر اعظم شہباز شریف نے ترلائی میں واقع امام بارگاہ خدیجۃ الکبریٰ کا دورہ کیا۔ اور دہشت گردی کے افسوسناک واقعے میں شہید ہونے والے افراد کے لواحقین سے ملاقات کر کے تعزیت کا اظہار کیا۔ وزیراعظم نے شہداء کے درجات کی بلندی اور زخمیوں کی جلد صحتیابی کے لیے دعا کی۔

شہباز شریف نے کہا کہ افسوسناک واقعے پر پوری قوم غمزدہ ہے۔ اور ہم سب کے دل دکھی ہیں۔ دہشت گردوں کا کوئی مذہب نہیں ہوتا اور پوری قوم نے اس واقعے کی شدید مذمت کی ہے۔

وزیراعظم نے نوجوان عون عباس کی قربانی اور بہادری کو سنہرے حروف میں یاد رکھنے کا عزم ظاہر کیا۔

شہباز شریف نے مسلمانوں میں تفریق پیدا کرنے کی ناپاک سازش کو ناکام بنانے کی ضرورت پر زور دیا۔ اور کہا کہ تمام مکاتب فکر کے علما کرام نے اس واقعے کی شدید مذمت کی ہے۔

وزیر اعظم نے اعلان کیا کہ شہداء کے لواحقین کو فی کس 50 لاکھ روپے اور زخمیوں کو فی کس 30 لاکھ روپے فراہم کیے جائیں گے۔ افواج پاکستان سمیت تمام سیکیورٹی ادارے ملکی تحفظ کے لیے قربانیاں دے رہے ہیں۔