ن لیگ آزاد کشمیر کے صدر شاہ غلام قادر سے فوکل پرسن وزیراعظم یوتھ پروگرام سید ذیشان علی نقوی کی ملاقات، کامیابی پر مبارکباد پیش کی

اسلام آباد (صدائے سچ نیوز) آزاد کشمیر کے حالیہ انتخابات میں پاکستان مسلم لیگ (ن) کی شاندار کامیابی پر پاکستان مسلم لیگ (ن) آزاد کشمیر کے صدر شاہ غلام قادر سے پاکستان مسلم لیگ (ن) کے رہنما، فوکل پرسن وزیراعظم یوتھ پروگرام و سابق ڈپٹی میئر اسلام آباد سید ذیشان علی نقوی نے ملاقات کی اور انہیں انتخابی کامیابی پر دلی مبارکباد پیش کی۔

اس موقع پر سید ذیشان علی نقوی نے کہا کہ آزاد کشمیر کے عوام نے پاکستان مسلم لیگ (ن) کی قیادت پر بھرپور اعتماد کا اظہار کیا ہے، جو جماعت کی عوامی خدمت، مؤثر پالیسیوں اور مضبوط قیادت کا ثبوت ہے۔

انہوں نے شاہ غلام قادر کو اس کامیابی پر مبارکباد دیتے ہوئے نیک خواہشات کا اظہار کیا اور کہا کہ پاکستان مسلم لیگ (ن) کی قیادت میاں محمد نواز شریف، وزیراعظم محمد شہباز شریف اور وزیراعلیٰ پنجاب مریم نواز شریف کی رہنمائی میں عوامی خدمت کا سفر مزید مضبوط ہوگا۔

سید ذیشان علی نقوی نے اس امید کا اظہار کیا کہ شاہ غلام قادر اپنی قیادت میں آزاد کشمیر میں جماعت کو مزید مضبوط بنانے اور عوام کی خدمت کے لیے بھرپور کردار ادا کرتے رہیں گے۔

ملاقات کے دوران چیس فیڈریشن آف پاکستان کے وائس چیئرمین ملک ریحان، چیئرمین یونین کونسل شاہ اللہ دتہ سید زکی حیدر شاہ اور شاہ غلام قادر کے میڈیا کوآرڈینیٹر راجہ نادر بھی موجود تھے۔ اس موقع پر وفد نے شاہ غلام قادر کو گلدستہ پیش کیا اور آزاد کشمیر کے انتخابات میں شاندار کامیابی پر دلی مبارکباد پیش کرتے ہوئے ان کے لیے نیک تمناؤں کا اظہار کیا۔