پاکستان سمیت دنیا بھر میں ہندو برادری آج دیوالی کا تہوار منا رہی ہے

پاکستان کے مختلف شہروں میں ہندو برادری دیوالی کا تہوار مذہبی عقیدت اور بھرپور جوش و خروش سے منا رہی ہے، اس موقع پر ملک بھر کے مندروں میں خصوصی تقریبات اور انتظامات کیے گئے ہیں۔

ملک کے دیگر شہروں کی طرح اسلام آباد میں بھی گھروں اور دیگر مقامات پر تقاریب کا انعقاد کیا جارہا ہے۔ کہیں رنگولی بنائی گئی تو کہیں آتش بازی ہوری ہے، جشن کا یہ سلسلہ صبح تک جاری رہے  گا۔

کراچی میں بھی ہندو برادری دیوالی کا مذہبی تہوار روایتی جوش و خروش سے منا رہی ہے، سوامی نارائن مندر میں دیوالی کے موقع پر جشن کا کیا خوبصورت منظر ہے۔

تھرپارکر میں ہندو برادری کا مذہبی تہوار دیوالی جوش و خروش سے منایا جا رہا ہے، گھروں، مندروں اور بازاروں کو رنگ برنگی برقی قمقموں، موم بتیوں اور دیوں سے سجا دیا گیا ہے۔

دیوالی ہندو مذہب کا ایک اہم تہوار ہے اور اسے ’روشنیوں کے تہوار‘ کے طور پر جانا جاتا ہے کیونکہ لوگ اس تہوار کے موقع پر دیے اور موم بتیاں روشن کرتے ہیں جو کہ روشنی کے اندھیرے پر اور اچھائی کے برائی پر غالب آنے کی علامت ہے۔