خاتون اینکرپرسن رابعہ احسن کا قتل، آصفہ بھٹو زرداری اور وفاقی وزیر حنیف عباسی کا اظہارِ افسوس، شفاف تحقیقات کا مطالبہ

اسلام آباد (صداۓ سچ نیوز) خاتونِ اول بی بی آصفہ بھٹو زرداری اور وفاقی وزیر ریلوے محمد حنیف عباسی نے راولپنڈی میں خاتون اینکرپرسن و صحافی رابعہ احسن کے قتل پر گہرے دکھ اور افسوس کا اظہار کرتے ہوئے واقعے کی شدید مذمت کی ہے اور مطالبہ کیا ہے کہ قتل کی مکمل، شفاف اور غیر جانب دارانہ تحقیقات کرکے ذمہ دار عناصر کو قانون کے کٹہرے میں لایا جائے۔

خاتونِ اول بی بی آصفہ بھٹو زرداری نے سماجی رابطے کی ویب سائٹ ایکس پر اپنے پیغام میں کہا کہ رابعہ احسن کا قتل ایک انتہائی افسوسناک اور تشویش ناک واقعہ ہے۔ انہوں نے حقائق منظرِ عام پر لانے اور ذمہ داروں کو انصاف کے کٹہرے میں لانے کے لیے شفاف تحقیقات کی ضرورت پر زور دیا۔

انہوں نے اسی شہر میں پیش آنے والے ایک اور افسوسناک واقعے کا حوالہ دیتے ہوئے کہا کہ تین ماہ سے بھی کم عرصہ قبل حنا جاوید کو بھی قتل کر دیا گیا تھا، تاہم ان کے قتل کی تحقیقات کے نتائج تاحال سامنے نہیں آ سکے۔ خاتونِ اول نے اس صورتحال پر گہری تشویش کا اظہار کرتے ہوئے کہا کہ ایسے واقعات سنجیدہ توجہ اور جواب دہی کے متقاضی ہیں۔

بی بی آصفہ بھٹو زرداری کا کہنا تھا کہ خواتین کو یہ تحفظ حاصل ہونا چاہیے کہ وہ اپنی جان کے خوف کے بغیر آزادانہ زندگی گزار سکیں اور اپنے پیشہ ورانہ فرائض انجام دے سکیں۔

دوسری جانب وفاقی وزیر ریلوے محمد حنیف عباسی نے اپنے بیان میں رابعہ احسن کے قتل کو انتہائی افسوسناک اور دلخراش واقعہ قرار دیتے ہوئے کہا کہ ان کی اچانک وفات پر انہیں دلی صدمہ پہنچا ہے۔ انہوں نے بھی واقعے کی شفاف اور غیر جانب دارانہ تحقیقات اور ملوث عناصر کو انصاف کے کٹہرے میں لانے کا مطالبہ کیا۔

وفاقی وزیر نے مرحومہ کے لیے دعائے مغفرت کرتے ہوئے کہا کہ اللہ تعالیٰ انہیں جوارِ رحمت میں اعلیٰ مقام عطا فرمائے اور سوگوار خاندان کو یہ ناقابلِ تلافی نقصان برداشت کرنے کا حوصلہ اور صبرِ جمیل عطا کرے۔

محمد حنیف عباسی نے مزید کہا کہ خواتین صحافیوں اور میڈیا سے وابستہ افراد کی جان و سلامتی یقینی بنانا معاشرے اور متعلقہ اداروں کی مشترکہ ذمہ داری ہے۔ خواتین کے خلاف تشدد اور قتل کسی صورت قابلِ قبول نہیں اور ایسے افسوسناک واقعات کی روک تھام کے لیے مؤثر اقدامات ناگزیر ہیں۔

رابعہ احسن کے قتل کے بعد سیاسی و حکومتی شخصیات کی جانب سے اظہارِ افسوس اور شفاف تحقیقات کے مطالبات نے خواتین صحافیوں اور میڈیا سے وابستہ افراد کے تحفظ، ان کے لیے محفوظ ماحول کی فراہمی اور ایسے واقعات میں فوری انصاف کی اہمیت کو ایک بار پھر اجاگر کر دیا ہے۔