چیئرمین سی ڈی اے کی پارک انکلیو میں کھلی کچہری، رہائشیوں کے مسائل ترجیحی بنیادوں پر حل کرنے کی ہدایت

اسلام آباد (صداۓ سچ نیوز) چیئرمین سی ڈی اے و چیف کمشنر اسلام آباد سہیل اشرف نے پارک انکلیو میں کھلی کچہری کا انعقاد کیا، جس میں رہائشیوں نے بنیادی سہولیات سے متعلق مسائل اور تجاویز پیش کیں۔

رہائشیوں نے صفائی، باؤنڈری وال کی مرمت، سکیورٹی، پارکس، بجلی کی فراہمی، سیوریج، پانی اور پارکنگ کے مسائل سے آگاہ کیا۔

چیئرمین سی ڈی اے نے متعلقہ افسران کو ہدایت کی کہ صفائی کا نظام بہتر بنایا جائے، فیز ون کی باؤنڈری وال کی مرمت، مرکزی مسجد کی تعمیر مکمل اور پارکنگ کا مسئلہ فوری حل کیا جائے۔ انہوں نے فیز ٹو اور تھری میں بجلی کی فراہمی اور فیز تھری کے زیرِ التوا ترقیاتی کام جلد مکمل کرنے کی بھی ہدایت کی۔

انہوں نے پلاٹس کا قبضہ کیو آر کوڈ کے ذریعے شفاف اور آسان بنانے، کمرشل ایریاز کو جدید خطوط پر استوار کرنے اور بلیوارڈ روڈ پر اسٹریٹ لائٹس نصب کرنے کی ہدایت بھی کی۔ پارک انکلیو کے انتظامی امور بہتر بنانے کے لیے رہائشیوں پر مشتمل کمیٹی تشکیل دینے کی تجویز بھی دی۔

چیئرمین سی ڈی اے نے یقین دہانی کرائی کہ پارک انکلیو کے تمام فیزز کے مسائل ترجیحی بنیادوں پر حل کرکے رہائشیوں کو بہتر سہولیات فراہم کی جائیں گی۔

کھلی کچہری میں سی ڈی اے کے متعلقہ ممبران، ڈائریکٹر جنرلز، سینئر افسران اور بڑی تعداد میں شہریوں نے شرکت کی۔