بھارت کو ایسی شکست دی کہ اس کی نسلیں بھی یاد رکھیں گے، وزیر اعظم

مظفرآباد (صداۓ سچ نیوز) وزیر اعظم شہباز شریف نے کہا ہے کہ بھارت کو ایسی شکست دی کہ اس کی نسلیں بھی یاد رکھیں گی۔

وزیر اعظم شہباز شریف نے یوم یکجہتی کشمیر کے حوالے سے منعقدہ تقریب سے خطاب میں کہا کہ وہ پاکستانی عوام اور حکومت کی جانب سے کشمیری عوام سے اظہار یکجہتی کے لیے حاضر ہیں۔ جدوجہد آزادی کشمیر کے ہر قائد اور ہر شہری کو سلام عقیدت پیش کرتے ہیں۔

وزیراعظم نے سابق صدر آزاد کشمیر بیرسٹر سلطان محمود چودھری کی وفات پر گہرے رنج و غم کا اظہار کیا۔ اور مرحوم کے بلند درجات کے لیے دعا کی۔ انہوں نے کہا کہ کشمیری قوم اپنے بچوں تک کی قربانی دے سکتی ہے۔ مگر حق آزادی سے کبھی دستبردار نہیں ہو سکتی۔

انہوں نے کہا کہ بابائے قوم قائد اعظم محمد علی جناح نے کشمیر کو پاکستان کی شہ رگ قرار دیا تھا۔ اور یہی پاکستان کی خارجہ پالیسی کی بنیاد ہے۔ مسئلہ کشمیر کا حل اقوام متحدہ کی قراردادوں پر عملدرآمد سے ہی ممکن ہے۔

شہباز شریف نے کہا کہ جس طرح فلسطین کے عوام کو اپنی مرضی کے مطابق جینے کا حق حاصل ہے۔ اسی طرح کشمیری عوام کو بھی ان کا حق دیا جانا چاہیے۔ پاکستان نے اہم اسلامی ممالک کے ساتھ مل کر غزہ میں قیام امن کے لیے مؤثر اقدامات کیے ہیں۔

انہوں نے معرکہ حق کا حوالہ دیتے ہوئے کہا کہ پاکستان نے بھارت کو ذلت آمیز شکست سے دوچار کیا۔ اور فیلڈ مارشل کی قیادت میں دی گئی اس شکست کو بھارت کی نسلیں بھی فراموش نہیں کر سکیں گی۔ معرکہ حق میں شاندار کامیابی کے باعث مسئلہ کشمیر پوری دنیا میں اجاگر ہوا اور عسکری و سفارتی محاذ پر بھارتی جھوٹ کا بیانیہ دفن ہو چکا ہے۔

وزیراعظم نے کہا خارجہ محاذ پر بھی پاکستان نے نمایاں کامیابیاں حاصل کیں۔ جبکہ مسئلہ کشمیر کو عالمی سطح پر مؤثر انداز میں اجاگر کرنے پر نائب وزیر اعظم کی کاوشیں لائق تحسین ہیں۔

انہوں نے کہا کہ ذلت آمیز شکست کے بعد وہ اپنی پراکسیز کے ذریعے پاکستان میں دہشتگردی کرا رہا ہے۔ وزیراعظم نے واضح کیا کہ بھارت کے جارحانہ اور تسلط پسند عزائم ترک کرنے تک خطے میں پائیدار امن قائم نہیں ہو سکتا۔ پاکستان امن کا خواہاں ہے۔ مگر یہ امن برابری کی سطح پر ہی ممکن ہے۔

وزیراعظم شہباز شریف نے آزاد کشمیر کے لیے متعدد ترقیاتی و فلاحی اعلانات بھی کیے۔ انہوں نے مظفرآباد میں اسلام آباد کی طرز پر خدمت سینٹر قائم کرنے کا اعلان کیا۔ اس کے علاوہ مہاجرین کا وظیفہ 3500 روپے سے بڑھا کر 6 ہزار روپے ماہانہ کرنے کا بھی اعلان کیا گیا۔

انہوں نے کہا کہ کشمیری نوجوانوں کو جدید ہنر فراہم کرنے کے لیے دانش یونیورسٹی کا سب کیمپس مظفرآباد میں قائم کیا جائے گا۔ رواں سال 2069 کشمیری طلبا کو لیپ ٹاپ فراہم کیے جا چکے ہیں۔ جبکہ مزید 1700 طلبا کو بھی لیپ ٹاپ دیئے جائیں گے۔

وزیر اعظم نے آزاد کشمیر میں اسکولوں کی چھتوں کی تعمیر و مرمت کے لیے ایک ارب روپے کے فنڈز دینے کا بھی اعلان کیا۔ انہوں نے کہا کہ نواز شریف کے ویژن کے مطابق کشمیر کاز اور قومی ترقی کے اہداف حاصل کیے جائیں گے۔