سندھ میں تعلیمی سال 2026-27 کا آغاز یکم اپریل، امتحانات اور داخلے کے شیڈول کی منظوری

کراچی (صداۓ سچ نیوز) سردار علی شاہ کی زیر صدارت اسٹیئرنگ کمیٹی کے اجلاس میں تعلیمی سال 2026-27 کے آغاز، داخلہ شیڈول، امتحانات اور تعطیلات کے باقاعدہ شیڈول کی منظوری دی گئی۔

اجلاس میں فیصلہ کیا گیا کہ تعلیمی سال یکم اپریل 2026 سے شروع ہوگا جبکہ نویں جماعت تک داخلے یکم مارچ سے 31 مارچ تک جاری رہیں گے۔

گیارہویں جماعت میں داخلے سینٹرل ایڈمیشن پالیسی کے تحت یکم جون سے جولائی کے آخری ہفتے تک مکمل کیے جائیں گے۔

پہلی سے تیسری جماعت کے طلبہ کو بغیر امتحان کے اگلی جماعت میں ترقی دی جائے گی، جبکہ چوتھی سے آٹھویں جماعت کے امتحانات یکم تا 15 مارچ 2026 تک ہوں گے۔

نویں اوردسویں جماعت کے امتحانات 30 مارچ سے 15 اپریل تک منعقد ہوں گے، دسویں جماعت کا نتیجہ یکم جون اور نویں جماعت کا نتیجہ 15 جون 2026 کو جاری کیا جائے گا۔

گیارہویں اور بارہویں جماعت کے امتحانات 15 تا 30 اپریل تک ہوں گے، بارہویں جماعت کا نتیجہ 15 جون اور گیارہویں جماعت کا نتیجہ یکم جولائی کو جاری کیا جائے گا۔

موسم گرما کی تعطیلات یکم جون سے 31 جولائی اور موسم سرما کی تعطیلات 21 دسمبر سے 31 دسمبرتک برقرار رکھی جائیں گی۔

سال 2026 کو ماحولیاتی آگاہی کا سال قرار دیتے ہوئے تمام تعلیمی اداروں میں شجرکاری مہم چلانے اور ہر طالب علم و استاد کو کم از کم ایک درخت لگانے کی ہدایت دی گئی۔

اجلاس میں اسٹیئرنگ کمیٹی کی تشکیل نو، نویں و دسویں جماعت کے نئے یکساں نصاب کا 2027 سے نفاذ، اور STEAM پروگرام کے تحت اسکول سطح پر اگست میں مقابلوں کے انعقاد کا فیصلہ بھی شامل تھا۔