ایران میں امریکی صدر کو نشانہ بنانے کیلئے کراؤڈ فنڈ مہم، 5 کروڑ ڈالر سے زائد رقم جمع ہوگئی

تہران (صداۓ سچ نیوز) ایرانی خبررساں ایجنسی کے مطابق امریکی صدر ڈونلڈ ٹرمپ کو نشانہ بنانے سے متعلق ایک کراؤڈ فنڈ مہم میں 5 کروڑ ڈالر سے زائد رقم جمع ہونے کا دعویٰ کیا گیا ہے۔

رپورٹ میں کہا گیا ہے کہ اس مہم کی تشہیر بڑے بل بورڈز اور ایک مخصوص ویب سائٹ کے ذریعے کی جا رہی ہے جس کا مقصد امریکی صدر کے قتل کے لیے بھاری انعام مقرر کرنا ہے۔

اطلاعات کے مطابق ایران کی بڑی شاہراہوں پر نصب بل بورڈز میں ٹرمپ کی تصویر کو  اسنائپر رائفل کی دوربین کے اندر دکھایا گیا ہے۔

بینرز پر فارسی زبان میں درج ہے کہ ‘اب تک حامیوں کی جانب سے اعلان کردہ رقم: 50,541,000 ڈالر‘، جبکہ ساتھ ہی یہ جملہ بھی لکھا ہے کہ ’ٹرمپ کو جلد ہی ختم کردو‘ بھی تحریر ہے۔

یہ مہم ایسے وقت سامنے آئی ہے جب ایران، امریکا اور اسرائیل کے درمیان کشیدگی جاری ہے، جس کا آغاز 28 فروری 2026 کو ہوا تھا۔ ابتدائی حملوں میں ایران کے سپریم لیڈر سید علی خامنہ ای اور اعلیٰ فوجی کمانڈرز ہلاک ہوئے تھے۔

ماہرین کے مطابق یہ مہم ان حملوں کے ردعمل کے طور پر سامنے آئی ہے، جبکہ ماضی میں بھی ایران کے حکام، سائنسدانوں اور کمانڈرز کو نشانہ بنایا جاتا رہا ہے۔