فیلڈ مارشل عاصم منیر کے لیے نوبیل امن انعام کی نامزدگی کا مطالبہ

راولپنڈی (صداۓ سچ نیوز) راولپنڈی میں پاکستان ایکس سروس مین سوسائٹی نے چیف آف ڈیفنس فورسز اور آرمی چیف فیلڈ مارشل عاصم منیر کو عالمی امن کے فروغ، تنازعات کے خاتمے اور بین الاقوامی مکالمے کو فروغ دینے میں کردار کے اعتراف کے طور پر نوبیل امن انعام کے لیے نامزد کرنے کا مطالبہ کر دیا ہے، جسے پاکستان کے مثبت عالمی تشخص سے جوڑا جا رہا ہے۔

راولپنڈی کے ایک نجی ہوٹل میں تنظیمی عہدیداران سے گفتگو کرتے ہوئے پاکستان ایکس سروس مین سوسائٹی کے چیف آرگنائزر اور میڈیا کوآرڈینیٹر عزیز احمد اعوان نے کہا کہ فیلڈ مارشل عاصم منیر کی قیادت میں پاکستان کا عالمی امیج نمایاں طور پر بہتر ہوا ہے اور ملک نے بین الاقوامی سطح پر اپنا باوقار مقام دوبارہ حاصل کیا ہے۔

یہ بھی پڑھیں: فیلڈ مارشل عاصم منیر کی ایرانی صدر مسعود پزشکیان سے ملاقات

انہوں نے کہا کہ ماضی میں بھارت کے پراپیگنڈے کے باعث پاکستان کو مختلف سفارتی چیلنجز کا سامنا رہا، تاہم حالیہ برسوں میں مؤثر پالیسیوں اور حکمت عملی کے نتیجے میں پاکستان کا مثبت تشخص دنیا کے سامنے مؤثر انداز میں اجاگر ہوا ہے۔

ان کا کہنا تھا کہ عالمی برادری اب پاکستان کو ایک ذمہ دار، امن پسند اور تعمیری کردار ادا کرنے والے ملک کے طور پر دیکھ رہی ہے، جبکہ پاکستان مخالف بیانیہ بتدریج کمزور پڑ رہا ہے۔

عزیز احمد اعوان نے مزید کہا کہ فیلڈ مارشل عاصم منیر کی قیادت میں نہ صرف دفاعی نظام مضبوط ہوا بلکہ سفارتی محاذ پر بھی نمایاں کامیابیاں حاصل کی گئیں، اور پاکستان اندرونی استحکام اور معاشی بہتری کی جانب پیش رفت کر رہا ہے۔

اس موقع پر پاکستان ایکس سروس مین سوسائٹی نے باضابطہ طور پر مطالبہ کیا کہ فیلڈ مارشل عاصم منیر کو عالمی امن، کشیدگی میں کمی اور بین الاقوامی مکالمے کے فروغ میں خدمات کے اعتراف میں نوبیل امن انعام کے لیے نامزد کیا جائے، کیونکہ ان کی قیادت میں کیے گئے اقدامات نہ صرف پاکستان بلکہ عالمی امن کے لیے بھی اہمیت کے حامل قرار دیے جا رہے ہیں۔