بارشوں کا نیا سلسلہ، آندھی، گرج چمک، ژالہ باری اور برف باری کا امکان

اسلام آ باد (صداۓ سچ نیوز) این ڈی ایم اے کی جانب سے 18 سے 23 اپریل کے دوران بارش اور ژالہ باری کا الرٹ جاری کردیا گیا۔  خیبرپختونخوا میں مختلف مقامات پر برف باری ہونے کا بھی امکان ہے۔

الرٹ کے مطابق بالائی اور وسطی پنجاب میں 18 اور 19 اپریل کو بارش اور چند مقامات پر ژالہ باری متوقع ہے ۔جنوبی پنجاب میں 18 سے 23 اپریل کے دوران چند مقامات پر ہلکی بارش کی پیشگوئی۔

یہ بھی پڑھیں: آبنائے ہرمز میں پاکستانی جہازوں، عملےکی سلامتی اور محفوظ بحری آمدورفت یقینی بنائی جائے، پاکستانی مندوب

گوادر اور ساحلی علاقوں میں 19، 20 اور 23 اپریل کو بارش ہو سکتی ہے ۔ سندھ میں خیرپور ، سکھر ، حیدرآباد ، عمرکوٹ ، مٹھی، بدین، کراچی میں 19 اور 20 اپریل کو بارش کا امکان ہے۔

سندھ کے متعدد اضلاع میں دن کا درجہ حرارت معمول سے زیادہ رہنے کی توقع ہے ۔ خیبرپختونخوا میں چترال، دیر، ملاکنڈ، چارسدہ، ایبٹ آباد ، بنوں، بونیر، پشاور سمیت بیشتر اضلاع میں بارش جبکہ بالائی اور پہاڑی علاقوں میں بعض مقامات پر برفباری بھی متوقع ہے۔

یہ بھی پڑھیں: اسرائیل اور لبنان کے درمیان جنگ بندی کا آغاز، پاکستان اور فیلڈ مارشل عاصم منیر کے شکر گزار ہیں، محمد باقر قالیباف

این ڈی ایم اے نے خبردار کیا ہے کہ بارش کے باعث  کمزور تعمیرات ، درختوں اور بجلی کی تنصیبات کو نقصان پہنچ سکتا ہے،  سڑکوں پر پھسلن سے ٹریفک کی روانی متاثر ہونے کا خدشہ ہے۔

قبل ازیں محکمہ موسمیات نے 16 سے سے18اپریل کے دوران بھی تیز بارشوں کی پیشگوئی کی ہے، بالائی خیبرپختونخوا، آزاد کشمیر اور گلگت بلتستان میں لینڈ سلائیڈنگ کاخدشہ ہے، مقامی ندی نالوں میں پانی کے بہاؤمیں اضافہ ہونےکاخطرہ ہے۔