جمائما گولڈ اسمتھ نے آئرش نژاد سرمایہ کار کیمرون اوریلی سے منگنی کرلی، جلد شادی متوقع: برطانوی اخبار

جمائما گولڈ اسمتھ نے آئرش نژاد سرمایہ کار کیمرون او ریلی سے منگنی کرلی اور دونوں کی شادی جلد متوقع ہے۔

برطانوی اخبار کے مطابق 52 سالہ جمائما گولڈ اسمتھ اور 62 سالہ کیمرون اوریلی کے درمیان تعلق ایک سال سے زائد عرصے سے قائم تھا۔

رپورٹ میں کہا گیا ہے کہ دونوں کی ملاقات فلمی منصوبوں کے دوران ہوئی جہاں کیمرون او ریلی بطور ایگزیکٹو پروڈیوسر کام کر رہے تھے۔

ذرائع کے مطابق یہ جوڑا اپنا وقت سوئٹزرلینڈ میں کیمرون او ریلی اور ویسٹ لندن جمائما گولڈاسمتھ کے گھر گزارتا ہے۔

خیال رہے کہ جمائما گولڈ اسمتھ سابق وزیر اعظم پاکستان عمران خان کی سابقہ اہلیہ ہیں، دونوں نے 9 سال ساتھ گزارنے کے بعد 2004 میں علیحدگی کا اعلان کیا تھا۔