بڑھتے ہوئے خطرات سے نمٹنے کے لیے مسلم ممالک کے درمیان تزویراتی روابط بڑھانے پر زور

اسلام آباد (صداۓ سچ نیوز) تیزی سے بدلتی ہوئی جغرافیائی سیاسی صورتحال اور ابھرتے ہوئے عالمی چیلنجز سے مؤثر انداز میں نمٹنے کے لیے مسلم ممالک کے درمیان زیادہ مضبوط تزویراتی روابط اور ادارہ جاتی تعاون ناگزیر ہیں۔ اس تناظر میں ایشیا پیسیفک خطہ، جہاں متعدد مسلم اکثریتی ممالک واقع ہیں، غیر معمولی اہمیت کا حامل ہے۔

یہ بات ملائیشیا کے انٹرنیشنل انسٹی ٹیوٹ آف ایڈوانسڈ اسلامک اسٹڈیز (آئی اے آئی ایس ) کے ایک وفد نے اسلام آباد میں انسٹی ٹیوٹ آف پالیسی اسٹڈیز (آئی پی ایس) کے دورے کے موقع پر کہی۔ اس موقع پر دونوں اداروں کے درمیان مفاہمت کی یادداشت پر بھی دستخط کیے گئے۔

آئی اے آئی ایس کے وفد میں ادارے کے سربراہ ڈاکٹر سید ازمن بن سید احمد نواوی، نائب سربراہ ڈاکٹر احمد بدری بن عبداللہ، تحقیقی و اشاعتی شعبے کے نگران ڈاکٹر عبداللطیف بن محمد ابراہیم اور اسٹریٹجک یونٹ کے خصوصی افسر برائے بین الاقوامی امور محمد فیض بن مد نواوی شامل تھے۔ آئی پی ایس کی نمائندگی چیئرمین خالد رحمان، وائس چیئرمین سید ابرار حسین، کشمیر امور کے ماہر عبد الرشید ترابی، ہیڈ آف آپریشنز شفق سرفراز اور ریسرچ فیلو ندیم فرحت نے کی۔

شرکاء نے اتفاق کیا کہ بین الاقوامی نظام میں نمایاں تبدیلیوں کے باعث مسلم دنیا کو پیچیدہ نوعیت کے متعدد چیلنجز کا سامنا ہے۔ بالخصوص ایشیا میں مسلم ممالک کے درمیان قریبی روابط کی اہمیت بڑھ گئی ہے، جہاں مسلم آبادی کے حجم کے ساتھ ساتھ معاشی استعداد اور تزویراتی اہمیت بھی نمایاں ہے۔ شرکا نے عالمی اور علاقائی پیش رفت کے بارے میں زیادہ مؤثر اور فعال ردعمل کے لیے باہمی رابطوں، معلومات کے تبادلے اور ادارہ جاتی روابط کو اہم قرار دیا۔

مذاکرات میں فلسطین، مقبوضہ کشمیر، افغانستان، سوڈان اور دیگر تنازعات سے متاثرہ خطوں کی صورتحال بھی زیر بحث آئی۔ شرکا نے ان بحرانوں کی تشکیل کرنے والے سیاسی، سماجی اور جغرافیائی و سیاسی عوامل کو بہتر طور پر سمجھنے کی ضرورت پر زور دیا اور کہا کہ دیرینہ تنازعات کو صرف قلیل مدتی بحرانوں کے طور پر دیکھنے کے بجائے ان پر مسلسل توجہ دینے کی ضرورت ہے۔

دونوں اداروں کے جغرافیائی و سیاسی امور کے ماہرین نے دنیا بھر میں مسلم آبادیوں کو متاثر کرنے والی موجودہ صورتحال پر اپنے تجزیے اور نقطۂ نظر کا تبادلہ کیا۔ فلسطین میں جاری نسل کشی اور مقبوضہ جموں و کشمیر میں انسانی حقوق کی مسلسل خلاف ورزیوں پر خصوصی توجہ دی گئی، جبکہ امن کے لیے سفارتی سطح پر پاکستان اور ملائیشیا کے تعمیری کردار کا بھی ذکر کیا گیا۔ آئی پی ایس کے ماہرین نے وفد کو عالمی امن اور علاقائی ہم آہنگی کے لیے پاکستان کے عزم کے باعث اسے درپیش جغرافیائی سیاسی چیلنجز سے آگاہ کیا۔

موجودہ بین الاقوامی نظام میں رونما ہونے والی تبدیلیوں اور عالمی نظم و نسق سے متعلق ابھرتی ہوئی بحث میں مسلم ممالک اور اداروں کے ممکنہ کردار پر بھی تبادلہ خیال کیا گیا۔ اس کے علاوہ مسلم فکر کی نوآبادیاتی اثرات سے نجات، اسلاموفوبیا، خاندانی و سماجی نظام اور مسلم معاشروں کو درپیش مسائل پر فکری و علمی روابط مضبوط بنانے جیسے موضوعات بھی زیر غور آئے۔

وفد نے مختلف حکومتی اداروں کے ساتھ مؤثر روابط کے تجربات اور مسلم معاشروں اور ان کے مشترکہ مسائل سے متعلق حقائق پر مبنی آگاہی اور پالیسی سازوں کے ساتھ مؤثر تزویراتی رابطہ کاری کے حوالے سے حاصل ہونے والے تجربات بھی شیئر کیے۔ شرکا نے زمینی حقائق کو سمجھنے اور پالیسی سازوں، حکومتوں اور دیگر متعلقہ فریقوں کے ساتھ براہ راست روابط برقرار رکھنے کی اہمیت پر زور دیا، جس کے ساتھ علمی و تحقیقی سرگرمیوں کو بھی جاری رکھا جائے۔

اس تناظر میں آئی پی ایس اور آئی اے آئی ایس کے درمیان مفاہمت کی یادداشت عالمی مسلم امور، بین الاقوامی تعلقات، نظم و نسق اور باہمی مفاہمت کے شعبوں میں پالیسی پر مبنی تحقیق، مکالمے اور تعاون کے لیے ایک فریم ورک فراہم کرتی ہے۔

دونوں اداروں نے مشترکہ سیمینارز اور کانفرنسوں، تحقیقی و پالیسی بریفز کے تبادلے، ایک دوسرے کے پروگراموں میں اسکالرز کی شرکت اور مشترکہ تحقیق و اشاعت سمیت عملی تعاون کے متعدد شعبوں کی نشاندہی کی۔ وفد نے شاعر و مفکر علامہ محمد اقبال کی تصانیف کے ملائی زبان میں تراجم پر مشتمل اپنی چند مطبوعات بھی پیش کیں۔ اس موقع پر آئی پی ایس کے بانی اور معروف دانشور پروفیسر خورشید احمد کو خراجِ تحسین پیش کرتے ہوئے ان کی بعض کتب کا ملائی زبان میں ترجمہ کرنے پر بھی اتفاق کیا گیا۔

ملاقات کے اختتام پر خالد رحمان نے اس امر پر زور دیا کہ اداروں کے درمیان مسلسل فکری و علمی تبادلے، تحقیق کے اشتراک اور براہ راست روابط سے عصر حاضر کے چیلنجز کی بہتر تفہیم پیدا کرنے اور زیادہ مؤثر پالیسی ردعمل تشکیل دینے میں مدد مل سکتی ہے۔