کارگو طیارہ حادثہ، بحری اور فضائی سرچ آپریشن جاری، تاحال کوئی سراغ نہ مل سکا

کراچی (صداۓ سچ نیوز) شارجہ سے کراچی آنے والا کے نجی ایئرلائن کا ایک مال بردار طیارہ کراچی کے قریب سمندر میں گر کر تباہ ہوگیا۔ ایئرلائن کا کہنا ہے کہ طیارے میں عملے کے 5 ارکان سوار تھے۔

نجی ایئرلائن کی جانب سے جاری اعلامیے کے مطابق بوئنگ 737 کارگو طیارہ گزشتہ رات شارجہ سے کراچی آ رہا تھا کہ رات 9 بج کر 21 منٹ پر اس کا ایئر ٹریفک کنٹرول سے رابطہ منقطع ہوگیا۔

ایئرلائن کا کہنا ہے کہ طیارے میں عملے کے پانچ ارکان سوار تھے،جن میں پائلٹ رضوان ادریس، فرسٹ آفیسر فیصل محمود، لوڈ ماسٹر توفیق خان، اور انجینئرز عارف صدیقی اور محمد حامد شامل ہیں۔

ذرائع کے مطابق لاپتا طیارے کی تلاش کیلئے بحری اور فضائی سرچ آپریشن جاری ہے تاہم نجی کمپنی کے کارگو طیارے کا 12 گھنٹے بعد بھی کوئی سراغ نہ مل سکا۔ گمشدگی کی وجہ سے متعلق ابھی تک کوئی بریک تھرو سامنے نہ آسکا۔

سرچ آپریشن کا دائرہ مزید وسیع کر دیا گیا،حکام کے مطابق طیارے یا ملبے کا سراغ ملنے تک کچھ کہنا قبل از وقت ہے، ملبہ اور فلائٹ ریکارڈر ہی حقیقت سامنے لائیں گے۔

ایوی ایشن ماہرین کے مطابق سمندری حادثات کی تحقیقات موسم، لہروں اور پانی کی گہرائی سے متاثر ہوتی ہیں، ایوی ایشن تاریخ میں بعض لاپتا طیاروں کی تلاش برسوں تک جاری رہی، ملبہ ملنے تک حادثے کی وجوہات پر حتمی رائے ممکن نہیں۔

یاد رہے کہ گزشتہ روز شارجہ سے کراچی آنے والا نجی ایئرلائن کا کارگو طیارہ کراچی سے مغرب میں 155 ناٹیکل میل دور خلیج میں لاپتا ہوگیا۔

پاکستان ایئرپورٹس اتھارٹی نے کارگو طیارے کے لاپتا ہونے کی تصدیق کرتے ہوئے بتایا کہ شارجہ سے کراچی آنے والی کے ٹو ایئرویز کی کارگو پرواز سے رابطہ منقطع ہوگیا۔

کارگو طیارے نے رات 9 بج کر 18 منٹ پر نیویگیشنل سسٹم میں خرابی رپورٹ کی اور کراچی ایریا کنٹرول سینٹر نے فوری طور پر طیارے کی رہنمائی کی۔

حکام کے مطابق رات 9 بج کر 21 منٹ پر طیارہ ریڈار پر تیزی سے نیچے آتا دیکھا گیا اور طیارے نے اچانک اپنی سمت تبدیل کی، جس کے بعد کراچی سے تقریباً 155 ناٹیکل میل مغرب میں طیارے سے ریڈار اور مواصلاتی رابطہ منقطع ہوگیا۔