وفاقی وزیر برائے قومی ورثہ و ثقافت ڈویژن اورنگزیب خان کھچی کا عالمی یومِ ورثہ کے موقع پر پیغام

اسلام آباد (صداۓ سچ نیوز) وفاقی وزیر برائے قومی ورثہ و ثقافت ڈویژن اورنگزیب خان کھچی نے کیا کہ عالمی یومِ ورثہ کے موقع پر پوری قوم اور اُن تمام افراد کو دلی مبارکباد پیش کرتا ہوں جو ہمارے مشترکہ انسانی ورثے کے تحفظ کے لیے کوشاں ہیں۔ یہ دن ہمیں اس امر کی یاد دہانی کراتا ہے کہ ثقافتی ورثے کو آئندہ نسلوں کے لیے محفوظ رکھنا کس قدر اہم ذمہ داری ہے، جسے عالمی سطح پر یونیسکو بھی تسلیم کرتا ہے۔

پاکستان ایک بھرپور اور متنوع ورثے کا حامل ملک ہے، جو ہماری تاریخ کی گہرائی، ثقافتی رنگا رنگی اور عوام کی ثابت قدمی کی عکاسی کرتا ہے۔ قدیم تہذیبوں سے لے کر شاندار تعمیراتی شاہکاروں اور زندہ روایات تک، ہمارا ورثہ ہماری قومی شناخت اور فخر کا اہم ستون ہے۔

پاکستان کا ورثہ قدیم حجری دور سے شروع ہو کر نو حجری دور، کانسی کے زمانے، عظیم وادیٔ سندھ کی تہذیب، گندھارا کے دلکش فن، شاندار اسلامی ادوار اور مغلیہ سلطنت کی عظیم یادگاروں تک پھیلا ہوا ہے۔ پاکستان کے عالمی ورثہ کے مقامات نہ صرف وادیٔ سندھ کی تہذیب بلکہ گندھارا کے بدھ مت فن اور برصغیر کے اسلامی و مغلیہ طرزِ تعمیر کی شان و شوکت کی بھرپور نمائندگی کرتے ہیں۔

میں تمام متعلقہ فریقین، بشمول سرکاری اداروں، صوبائی حکومتوں، مقامی کمیونٹیز اور بالخصوص نوجوانوں سے اپیل کرتا ہوں کہ وہ ہمارے قیمتی ورثے کے تحفظ، بحالی اور فروغ کے لیے مشترکہ کاوشیں تیز کریں۔ پائیدار تحفظ نہ صرف ہماری قومی ذمہ داری ہے بلکہ یہ سیاحت، تعلیم اور سماجی و معاشی ترقی کے فروغ کا مؤثر ذریعہ بھی ہے۔

پاکستان کے ورثہ سے متعلق ادارے اپنے عالمی ورثہ کے مقامات اور تاریخی یادگاروں کے تحفظ، مرمت، دیکھ بھال اور مؤثر انتظام کے لیے جدید تقاضوں اور پیشہ ورانہ مہارت کے ساتھ بھرپور کردار ادا کر رہے ہیں۔

آئیے ہم سب مل کر اس عزم کی تجدید کریں کہ ہم اپنے قومی ورثے کو محفوظ رکھیں گے اور اسے آئندہ نسلوں تک نہ صرف اسی حالت میں منتقل کریں گے بلکہ مزید بہتر اور مستحکم بنا کر آگے بڑھائیں گے۔