ہری پور،حطار میں گیس پائپ لائن پھٹنے سے آتشزدگی سے آٹھ افراد جان بحق

ہری پور (صداۓ سچ نیوز) ہری پور کے علاقے حطار میں گیس پائپ لائن پھٹنے سے ہونے والی آتشزدگی سے آٹھ افراد جان بحق ہو گئے-

ریسکیو 1122 ہری پور کے مطابق حطار میں وولٹا فیکٹری کے سامنے مین گیس پائپ لائن پھٹنے سے خوفناک آگ بھڑک اٹھی،آگ نے نزدیک 03 گھروں کو اپنے لپیٹ میں لے لیا،گھروں میں موجود 20 سے 25 افراد فوری طور پر گھر سے باہر نکل آئے-

واقعہ کی اطلاع موصول ہوتے ہی ڈسٹرکٹ ایمرجنسی آفیسر ظاہر میاں کی قیادت میں ریسکیو 1122 کی فائر فائٹر ٹیمیں ہری پور اور خانپور سے موقع پر پہنچ گئیں اور گیس پائپ لائن کی گیس منقطع کرنے کیلئے محکمہ سوئی گیس سے رابطہ کیا گیا-

ریسکیو حکام کے مطابق 10 سے 11 افراد گھروں میں محصور ہوکر رہ گئے جن کو نکالنے کیلئے ریسکیو آپریشن کا آغاز کیا گیا،آگ نے 3 گھروں کو اپنی لپیٹ میں لے لیا-

ریسکیو ترجمان کے مطابق واقعے میں 8 افراد جانبحق اور 2 افراد کو گھر سے زندہ نکلا گیا جبکہ 1 شخص واقعہ دیکھ کر بے ہوش ہوگیا جس کو ریسکیو 1122 نے ابتدائی طبی امداد فراہم کرتے ہوئے ٹراما سینٹر منتقل کیا گیا-

ریسکیو حکام کے مطابق 5 جانبحق افراد کو آر ایچ سی کوٹ نجیب اللہ اور 3 جانبحق افراد کو ٹراما سینٹر منتقل کیا گیا-

ریسکیو آپریشن میں ضلع ہری پور ،ایبٹ آباد،مانسہرہ،صوابی اور پنجاب کی 13 فائر گاڑیوں اور 40 ریسکیو اہلکار اور 08 ایمبولینسز نے حصہ لیا-ریسکیو آپریشن میں ٹی ایم اے نے بھی حصہ لیا۔