غیر قانونی آپریشن بند کیا جائے، جبری بے دخل کیے جانے والوں کو ماڈل ویلج میں پلاٹ دئیے جائیں، تنویر حسین عباسی

اسلام آباد (صدائےسچ نیوز ) وزیر اعظم شہباز شریف نے ون کانسٹیٹیوشن ایوینو یا ٹون ٹاورز کے مالکان کے خلاف عدالتی فیصلہ آنے کے بعد سی ڈی اے اور ضلعی انتظامیہ کی طرف سے جبری بے دخلی کے آپریشن کا فوری نوٹس لیتے ہوئے اسے روکنے سمیت ایک اعلیٰ سطحی کمیٹی تشکیل دی ہے، جو ایک ہفتے میں اپنی رپورٹ وزیراعظم کو پیش کرے گی۔

اسی طرز پر نورپور شاہاں ، سیدپور اور ملپور میں رہائشیوں کے خلاف سی ڈی اے کی جانب سے غیر قانونی ، غیر آئینی اور جبری بے دخلی کا نوٹس لیں اور ایک باختیار کمیٹی بشمول مقامی نمائیندگی تشکیل دی دیں تاکہ اس ظلم و زیادتی کے ازالے کے علاؤہ کوئی قابلِ عمل طریقہ کار تیار کر کے ماڈل ویلج پر عملدرآمد کی راہ نکالی جاسکے, اور عشروں سے آباد رہائشیوں کو ناقابلِ برداشت صورتحال سے بچایا جا سکے۔

ان خیالات کا اظہار تنویر حسین عباسی صدر نور پور شاہاں کمیونٹی ڈیویلپمنٹ آرگنائزیشن نے تنظیم کے اجلاس سے خطاب کرتے ہوئے کیا ۔

اجلاس میں تمام ممبران نے سی ڈی اے کے نور پور شاہاں کے رہائشیوں کے خلاف ریاستی طاقت کے ذریعے جبری بے دخلی، بے بنیاد الزامات پر ایف آئی آر اور مکانات کو مسمار کر کے نقصان پہنچانے کے ظالمانہ عمل کی شدید مذمت کی۔ انہوں نے مطالبہ کیا کہ سی ڈی اے ماڈل ویلج پلان سامنے لائے اور گھروں کی مسماری فوری بند کرے ۔

تنویر عباسی نے کہا کہ سی ڈی اے ریاستی طاقت کے زور پر رہائشیوں کو گھنٹوں میں گھروں سے نکلنے پر مجبور کرتا ہے جس کی وجہ سے انسانی المیہ جنم لے رہا ہے۔ اعصابی دباؤ کے سبب بہت سے لوگ موت کے منہ میں چلے گئے جبکہ بہت سے مختلف بیماریوں کا شکار ہو گئے ۔ بچوں کے امتحانات اور تعلیم بری طرح متاثر ہوئی۔ کاروبار اور روزگار ختم ہو گیا لوگ غربت کی زندگی گزارنے پر مجبور ہوگئے ۔ متبادل رہائش نہ ہونے کے سبب دربدر کی ٹھوکریں کھانے پر مجبور ہو گئے ہیں ۔

تنویر حسین نے وزیراعظم سے مطالبہ کیا کہ بے گھر کئے جانے والوں کو ماڈل ویلج میں رہائشی پلاٹ الاٹ کئے جائیں جن رہائشیوں کے مکانات زبردستی گرائے گئے ۔ متاثرین کے نقصانات کا حکومت ازالہ کرے۔ ایف آئی آر کو واپس لیا جائے ۔