اسلام آباد ماڈل کالج ایف سکس ٹو میں سٹوڈنٹس کونسل کی تقریب حلف برداری

اسلام آباد (صداۓ سچ نیوز) اسلام آباد ماڈل کالج برائے طالبات ایف سکس ٹو میں سٹوڈنٹس کونسل 2026-27 کی تقریب حلف برداری منعقد ہوئی، جس میں نومنتخب صدر نمرہ فرمان سمیت مرکزی کونسل، ہیڈ گرلز، مختلف سوسائٹیز کے عہدیداران اور کلاس نمائندگان نے اپنے عہدوں کا حلف اٹھایا۔

تقریب کی مہمانِ خصوصی پارلیمانی سیکرٹری وزارتِ وفاقی تعلیم و پیشہ ورانہ تربیت رابعہ نسیم فاروقی تھیں، جبکہ ڈائریکٹر جنرل وفاقی نظامتِ تعلیم جاوید اقبال مرزا نے بطور مہمانِ اعزاز شرکت کی۔ تقریب میں وفاقی نظامتِ تعلیم کے افسران، اساتذہ اور کونسل اراکین کے والدین بھی شریک ہوئے۔

پرنسپل پروفیسر عالیہ دررانی نے اپنے خطاب میں نومنتخب کونسل کو مبارک باد دیتے ہوئے قیادت، ذمہ داری، نظم و ضبط، دیانت داری اور خدمت کی اہمیت پر زور دیا۔ انہوں نے کالج کی تعلیمی کامیابیوں کا ذکر کرتے ہوئے بتایا کہ ایس ایس سی سطح پر کالج کا نتیجہ 100 فیصد رہا، جبکہ ایچ ایس ایس سی اور بی ایس کی سطح پر بھی طالبات نے نمایاں کامیابیاں حاصل کیں۔

مہمانِ اعزاز جاوید اقبال مرزا نے نومنتخب کونسل اراکین کو مبارک باد دیتے ہوئے کہا کہ قیادت ایک ذمہ داری ہے اور عہدیداران کو ادارے کی اقدار، وقار اور روایات کو برقرار رکھنا چاہیے۔

مہمانِ خصوصی رابعہ نسیم فاروقی نے نومنتخب اراکین کو مبارک باد دیتے ہوئے انہیں دیانت داری، خدمت، عاجزی اور نظم و ضبط کو اپنانے کی تلقین کی۔ انہوں نے طالبات پر زور دیا کہ وہ اپنی تعلیمی کارکردگی برقرار رکھتے ہوئے مثبت رول ماڈل بنیں اور مستقبل کی ذمہ دار قیادت کے لیے خود کو تیار کریں۔

نومنتخب صدر نمرہ فرمان نے اساتذہ اور طالبات کا اعتماد کرنے پر شکریہ ادا کرتے ہوئے باہمی تعاون اور جدت کے ذریعے کونسل کی ذمہ داریاں احسن انداز میں ادا کرنے کے عزم کا اظہار کیا۔

تقریب میں سابق صدر سٹوڈنٹس کونسل ایمان عامر نے نئی صدر کے لیے نیک خواہشات کا اظہار کیا، جبکہ شمع کے تبادلے کی تقریب بھی منعقد ہوئی۔ تقریب کا اختتام فوٹو سیشن اور قومی ترانے کے ساتھ ہوا، جس کے بعد مہمانوں اور والدین کے لیے کالج لان میں ریفریشمنٹ کا اہتمام کیا گیا۔