پاکستان میں تقریباً 3 کروڑ 20 لاکھ افراد کو ذہنی صحت کی نگہداشت کی ضرورت ہے، وزیر مملکت مختار برتھ

اسلام آباد (صداۓ سچ نیوز) وزیرمملکت صحت ڈاکٹر مختار بھرتھ نے پاکستان گلوبل مینٹل ہیلتھ سمٹ کی اختتامی تقریب سے خطاب  کرتے ہوئے کہا کہ گلوبل مینٹل ہیلتھ سمٹ اختتام نہیں بلکہ پاکستان میں ذہنی صحت کے عملی قومی سفر کا آغاز ہے، اب وقت ہے کہ پالیسی اور وعدوں کو عملی اقدامات میں تبدیل کیا جائے۔

ڈاکٹرمختاربھرتھ  نے کہا کہ دو روزہ عالمی سمٹ کے دوران ماہرین،شراکت داروں اور نوجوانوں کی آراء کو سنا گیا ہے، پاکستان میں ذہنی صحت کے شعبے کیلئے مستقبل کا واضح راستہ متعین کرنے میں اہم کردار ادا کیا،ذہنی صحت کی سہولیات ہر بچے،نوجوان اور بالغ فرد کے گھر کے قریب پہنچانا قومی ترجیح ہے۔

انہو ں نے کہا کہ پاکستان میں تقریباً 3 کروڑ 20 لاکھ افراد کو ذہنی صحت کی نگہداشت کی ضرورت ہے،پاکستان میں ذہنی صحت کے علاج کا خلا تقریباً 95 فیصد ہے،یہ صرف اعداد وشمار نہیں،لاکھوں پاکستانیوں اورخاندانوں کی زندگیوں سےجڑامعاملہ ہے،پاکستان میں ہر ایک لاکھ افراد میں تقریباً 10 افراد سالانہ خودکشی کرتےہیں۔

ان کا کہنا تھا کہ خودکشی کے اعداد و شمار نہیں بلکہ ہمارے معاشرے کے افراد کی قیمتی زندگیاں ہیں، ذہنی بیماریاں قابلِ علاج ہیں، صحت یابی ممکن ہے،  ذہنی صحت کو بنیادی صحت کے نظام اور ہر سکول کا حصہ بنانا ہوگا،  قومی ذہنی صحت پالیسی 2026–35 پاکستان کیلئےعملی قومی فریم ورک ہے۔

ڈاکٹرمختاربھرتھ  نے کہا کہ صوبےاور وفاقی اکائیاں 45 روز میں قومی ذہنی صحت پالیسی کی تحریری توثیق کریں،ذہنی صحت کیلئے نیشنل ہب آف ایکسیلنس قائم کیا جائے گا، آئندہ 2 سے 3 برس میں ذہنی صحت کی خدمات،افرادی قوت اورنظام میں نمایاں پیشرفت دکھانا ہوگی، اسکولزمیں ماہرینِ نفسیات سمیت ذہنی صحت کی افرادی قوت میں اضافہ کیا جائےگا،ذہنی صحت کو قوانین، بجٹ، ہیلتھ بینیفٹ پیکیجز اور ہیلتھ ڈیٹا کا حصہ بنایا جائےگا۔