ہماری زندگی حرام ہے، چھوٹے پولیس اہلکاروں کا آئی جی خیبر پختونخواہ کے نام کھلا خط

پشاور(کامران گل: صدائے سچ نیوز) خیبرپختونخوا پولیس کے ایک کنسٹیبل نے پولیس کے اعلیٰ حکام کو تحریری درخواست جمع کراتے ہوئے اپنے ساتھ مبینہ ناانصافی، غیر منصفانہ تبادلوں، ذہنی دباؤ اور سروس سے متعلق مسائل پر شدید تحفظات کا اظہار کیا ہے۔

درخواست گزار کنسٹیبل کے مطابق اسے مختلف اوقات میں ایسے فیصلوں کا سامنا کرنا پڑا جو قواعد و ضوابط کے برعکس ہیں، جبکہ اس کی کارکردگی اور سروس ریکارڈ کو نظر انداز کیا گیا۔

درخواست میں مؤقف اختیار کیا گیا ہے کہ بعض افسران کی جانب سے اختیارات کے مبینہ غلط استعمال کے باعث نہ صرف اس کی پیشہ ورانہ زندگی متاثر ہوئی بلکہ اسے شدید ذہنی اذیت کا بھی سامنا کرنا پڑا۔

درخواست میں مزید کہا گیا ہے کہ کنسٹیبل نے متعدد بار متعلقہ فورمز پر اپنی شکایات پیش کیں تاہم تاحال کوئی مؤثر شنوائی نہیں ہوئی۔

یہ بھی پڑھیں: تلہ گنگ بار الیکشن: ملک غلام اکبر اعوان ایڈووکیٹ بھاری اکثریت سے صدر منتخب

درخواست گزار نے مطالبہ کیا ہے کہ اس کے کیس کی غیر جانبدار انکوائری کی جائے، ذمہ داران کا تعین کیا جائے اور اسے انصاف فراہم کیا جائےکنسٹیبل کا کہنا ہے کہ خیبرپختونخوا پولیس کا سپاہی مشکل ترین حالات میں اپنی جان خطرے میں ڈال کر فرائض سرانجام دیتا ہے، ایسے میں اگر اسے ادارے کے اندر انصاف نہ ملے تو مورال شدید متاثر ہوتا ہے۔

درخواست میں اس امید کا اظہار بھی کیا گیا ہے کہ اعلیٰ حکام معاملے کا نوٹس لیتے ہوئے قانون اور انصاف کے تقاضوں کے مطابق فیصلہ کریں گےپولیس ذرائع کے مطابق درخواست موصول ہو چکی ہے اور معاملے کا جائزہ لیا جا رہا ہے تاہم اس حوالے سے تاحال کوئی باضابطہ مؤقف سامنے نہیں آ سکا۔