ایران پر بڑے سے بڑا حملہ بھی رجیم چینج نہیں لاسکے گا، امریکی انٹیلی جنس ایجنسیوں کی رپورٹ میں انکشاف

واشنگٹن (صداۓ سچ نیوز) امریکا کی 18 انٹیلی جنس ایجنسیوں نے قرار دیا ہے کہ ایران پر بڑے سے بڑا حملہ بھی وہاں رجیم چینج نہیں لاسکے گا۔

امریکی نیشنل انٹیلیجنس ایجنسی، 18 انٹیلی جینس ایجنسیوں پر مشتمل ہے۔ اس نے اپنی تازہ ترین مشترکہ رپورٹ میں قرار دیا ہے کہ ایران پر کوئی بڑا حملہ بھی وہاں رجیم چینج نہیں لاسکے گا۔

امریکی اخبار واشنگٹن پوسٹ کے مطابق خفیہ رپورٹ میں کہا گیا ہے کہ ایران کی اپوزیشن منقسم ہے اور اس کی جانب سے ایران کا کنٹرول سنبھالنے کا امکان نہیں ہے۔

اس رپورٹ کے بعد ٹرمپ کی جانب سے ایرانی قیادت کو ختم کر کے وہاں اپنی مرضی کا حکمران مسلط کرنے کے منصوبے پر شکوک و شبہات پیدا ہو گئے ہیں۔

امریکی اخبار نے ایک ماہر کے حوالے سے لکھا کہ ایرانی حکومت اگر ٹرمپ کے دباؤ میں فیصلے کرے، تو یہ ہر اس چیز کے خلاف ہو گا جس پر ایرانی نظام کی بنیاد ہے۔ 

رپورٹ میں کہا گیا کہ ایران کی مذہبی اسٹیبلشمنٹ کا بالائی طبقہ نظریاتی ہے اور امریکی سامراجیت کی مزاحمت کرنا اس کا نظریہ ہے۔ بروکنگز انسٹیٹیوٹ کے ایک ماہر نے کہا ہے کہ ایرانی حکومت کا مقابلہ کرنے کے لیے ایران میں کوئی اور قوّت موجود نہیں ہے۔