یوکرین کا روس کے بیلسٹک میزائل پلانٹ پر حملہ، ووٹکنسک کارخانے کو نشانہ بنایا

کیف (صداۓ سچ نیوز) یوکرین نے روس کے شمالی علاقے میں واقع بیلسٹک میزائل پلانٹ پر حملے کا دعویٰ کیا ہے۔

یوکرینی حکام کے مطابق حملے میں مقامی طور پر تیار کردہ فلیمنگو میزائل استعمال کیے گئے اور ہدف بنایا گیا پلانٹ یوکرین سے تقریباً 1,400 کلومیٹر (800 میل) کے فاصلے پر واقع تھا۔

نشانہ بننے والا مقام ووٹکنسک مشین بلڈنگ پلانٹ تھا، جو روس کی سرکاری ملکیت میں ہے اور اسکندر میزائل سسٹم سمیت جوہری صلاحیت رکھنے والے بین البراعظمی بیلسٹک میزائل تیار کرتا ہے۔

اس حملے کے دوران روس کے سمارا علاقے میں گیس پروسیسنگ پلانٹ کو بھی نشانہ بنایا گیا، جبکہ مقامی رہائشیوں کی جانب سے شیئر کی گئی ویڈیوزمیں علاقے سے سیاہ دھواں اٹھتے اور ووٹکنسک شہر میں کئی عمارتوں کی کھڑکیاں ٹوٹنے کی اطلاعات منظرعام پر آئیں۔

روس نے اس واقعے کے بعد خطے کے کئی ہوائی اڈوں کو عارضی طور پربند کردیا، یہ حملہ ایسے وقت میں کیا گیا جب امریکا کی ثالثی میں ماسکو اورکیف کے درمیان مذاکرات بدھ کے روز کسی پیشرفت کے بغیرختم ہوگئے۔

یوکرین نے امریکی امن منصوبے پر شدید ردعمل کا اظہار کیا اور اسے روس کے مطالبات کو تقویت دینے والا مسودہ قرار دیا۔

یوکرین کے اس حملے نے عالمی سطح پر توجہ حاصل کی اورجنگ کے تناظر میں روس اور یوکرین کے تعلقات میں نئی کشیدگی پیدا کی ہے، جس نے دنیا کو سیاسی اور فوجی محاذ پر تقسیم کر دیا ہے۔