وزیراعظم امدادی پیکیج کے تحت سانحہ ترلائی کلاں کے 40 شہداء کے لواحقین کو 20کروڑجاری، 168زخمیوں کی ادائیگیاں بھی تیار

اسلام آباد ( صداۓ سچ نیوز ) سانحہ ترلائی کلاں کے 40 شہداء کے لواحقین وزیراعظم پاکستان میاں محمد شہباز شریف کے امدادی پیکیج کے 20کروڑروپے کے چیک جاری کردیے گئے ہیں جبکہ اس سانحے کے زخمیوں کے امدادی چیک بھی تیار کرلیے ہیں جو تمام تر زخمیوں میں تقسیم کردیے جائیں گے ۔

اسلام آباد کی ضلعی انتظامیہ نے وزیراعظم پاکستان کی ہدایت پر سانحہ ترلائی کلاں کے متاثرین کی بحالی کیلیے امدادی پیکیج پر عملدرآمد کے لیے کام تیز کردیا ۔ اس حوالے سے وزیراعظم یوتھ پروگرام کے فوکل پرسن و سا بق ڈپٹی میئر سید ذیشان علی نقوی کیساتھ کوآرڈنیشن کی بدولت شہداء کے لواحقین میں پچاس پچاس لاکھ روپے کے چیک جاری کرنے کے بعد ایسے تمام زخمیوں جن کے کوائف مکمل تھے انکے لیے امدادی چیک تیار کرلیے گئے ہیں اور جن زخمیوں کے کوائف نامکمل ہیں ان کے حوالے سے جلد ڈیٹا مکمل کرنے کی ہدایت جاری کردی گئی تاکہ تمام متاثرین کو فوری طور پر چیک جاری کیے جاسکیں۔

تین شہداء کے لواحقین کے اسلام آباد سے باہر ہونے کی وجہ سے چیک وصول نہیں کرسکے ۔

یہ بھی پڑھیں: سانحہ ترلائی وزیراعظم امدادی پیکیج : لواحقین میں پچاس، پچاس لاکھ روپے کے چیک تقسیم

وزیراعظم یوتھ پروگرام کے فوکل پرسن سید ذیشان علی نقوی نے ڈپٹی کمشنر اسلام آباد عرفان نواز میمن سے ملاقات کی جس میں ڈپٹی کمشنر اسلام آباد نے انھیں ضلعی انتظامیہ کی تمام تر امدادی سرگرمیوں سے آگاہ کرتے ہوئے بتایا کہ جیسے ہی دیگر زخمی جن کے کوائف نامکمل ہیں جیسے ہی انکے کوائف مکمل ہو جائیں گے انکے چیک تیار کر لیے جائیں گے ۔

علاؤہ ازیں ڈپٹی کمشنر اسلام آباد نےگزشتہ دنوں سانحہ کے ایک اور شہید ساجد حسین کاجسد خاکی اور دس لواحقین کو بذریعہ پی آئی اے سکردو بھجوانے کا انتظام بھی وزیراعظم پاکستان یوتھ پروگرام کے فوکل پرسن سید ذیشان علی نقوی کی کوآرڈنیشن کے ساتھ کیا۔

امدادی پیکیج پر بروقت عملدرآمد ہونے پر شہداء اور زخمیوں کے لواحقین نے وزیراعظم پاکستان میاں محمد شہباز شریف ،وزیرداخلہ سید محسن رضا نقوی اور اسلام آباد انتظامیہ کا شکریہ ادا کیا

یادرہے کہ سرکاری اعداد و شمار کے مطابق زخمیوں کی کل تعداد 168 ہے۔ شدید زخمیوں کیلیے 30لاکھ جبکہ معمولی زخمیوں کیلیے دس لاکھ روپے امداد کا اعلان کیا گیا تھا