اردن کا ایران کی جانب سے داغے گئے میزائل مار گرانے کا دعویٰ

عمّان (صداۓ سچ نیوز) اردن کی مسلح افواج کا کہنا ہے کہ ملک کے فضائی دفاعی نظام نے جمعرات کی صبح ایران کی جانب سے داغے گئے 5 میزائلوں کو فضا میں ہی تباہ کر دیا ہے۔

اردن کی مسلح افواج کے ترجمان کے مطابق ریڈارز نے ان میزائلوں کا سراغ لگا لیا تھا جس کے بعد فضائی دفاعی یونٹس نے کامیابی کے ساتھ پانچوں اہداف کو مار گرایا۔

اس سے تقریباً ایک گھنٹہ قبل ایرانی ذرائع ابلاغ نے خبر دی تھی کہ اردن میں ’امریکی افواج کے زیرِ استعمال ایک اڈے‘ کی جانب کئی میزائل داغے گئے ہیں۔

بدھ کی صبح امریکی مرکزی کمان (سینٹکام) نے کہا تھا کہ ایران نے اردن میں ایک امریکی اڈے پر کئی بیلسٹک میزائل داغے۔ امریکہ نے اسے ’اچانک‘ حملہ قرار دیا تھا تاہم سینٹکام کا کہنا تھا کہ تمام میزائلوں کو فضا میں ہی تباہ کر دیا گیا۔