سہالہ سلاٹر ہاؤس کو اپ گریڈ کرنے کا فیصلہ مسترد، اسلام آباد کے لیے I-11/4 میں جدید سلاٹر ہاؤس بنایا جائے: جمعیت القریش میٹ ویلفیئر ایسوسی ایشن

اسلام آباد (صدائے سچ نیوز) آل پاکستان جمعیت القریش میٹ ویلفیئر ایسوسی ایشن کا اہم مشترکہ اجلاس مرکزی صدر خورشید احمد قریشی کی زیرِ صدارت اسلام آباد میں منعقد ہوا، جس میں جمعیت القریش میٹ ویلفیئر ایسوسی ایشن کے عہدیداران نے شرکت کی۔

اجلاس میں اسلام آباد ہائی کورٹ میں 6 اگست 2026 کو ہونے والی سماعت کے دوران سی ڈی اے کی جانب سے جمع کرائے گئے بورڈ میٹنگ کے منٹس اور سہالہ سلاٹر ہاؤس کو اپ گریڈ کرنے کے فیصلے پر تفصیلی غور کیا گیا۔

اجلاس میں سینئر نائب صدر جمعیت القریش میٹ ویلفیئر ایسوسی ایشن جاوید قریشی، جنرل سیکرٹری سردار ظہیر احمد، نائب صدر زاہد مسعود خان، نائب صدر آصف راجپوت، نائب صدر عبدالعزیز قریشی، نائب صدر شکیل عباسی، فنانس سیکرٹری سردار خضر حیات خان، پریس سیکرٹری اقبال قریشی اور دیگر عہدیداران نے شرکت کی۔

اجلاس میں سہالہ سلاٹر ہاؤس کو اپ گریڈ، ازسرِنو تعمیر یا جدید بنانے کے فیصلے کو متفقہ طور پر مسترد کرتے ہوئے کہا گیا کہ گزشتہ تین سال سے جاری طویل جدوجہد کے بعد سی ڈی اے اب یہ مؤقف اختیار کر رہا ہے کہ کمشنر راولپنڈی سے مشاورت کے بعد سہالہ سلاٹر ہاؤس کو اپ گریڈ کیا جائے گا، نیا تعمیر کیا جائے گا یا اسے جدید بنایا جائے گا، جو اسلام آباد میں گوشت کے کاروبار سے وابستہ اصل اسٹیک ہولڈرز کے مؤقف کو مکمل طور پر نظرانداز کرنے کے مترادف ہے۔

مرکزی صدر خورشید احمد قریشی نے کہا کہ سلاٹر ہاؤس کے استعمال اور اس سے براہِ راست وابستہ جمعیت القریش میٹ ویلفیئر ایسوسی ایشن کے عہدیداران ہی متعلقہ اسٹیک ہولڈرز ہیں، تو پھر ان کی مشاورت کے بغیر یہ فیصلہ کیسے کیا جا سکتا ہے؟

انہوں نے کہا کہ سی ڈی اے کو کسی بھی فیصلے سے قبل متعلقہ اسٹیک ہولڈرز کو اعتماد میں لے کر باقاعدہ مشاورت کرنی چاہیے، کیونکہ سلاٹر ہاؤس کے حوالے سے اصل ضرورت، مسائل اور زمینی حقائق سے سب سے زیادہ یہی اسٹیک ہولڈرز واقف ہیں۔
خورشید احمد قریشی نے کہا کہ سہالہ سلاٹر ہاؤس اسلام آباد میں گوشت کے کاروبار سے وابستہ اسٹیک ہولڈرز سے تقریباً 40 سے 50 کلومیٹر دور ہے، جبکہ یہ منصوبہ راولپنڈی کی حدود میں واقع ہے۔ اسلام آباد ایک الگ انتظامی ضلع اور پاکستان کا وفاقی دارالحکومت ہے، جس کے انتظامی امور بھی راولپنڈی سے الگ ہیں، اس لیے اسلام آباد کی ضروریات پوری کرنے کے لیے راولپنڈی کی حدود میں موجود ایک پرانے منصوبے پر انحصار کسی صورت مناسب نہیں۔

انہوں نے کہا کہ سہالہ سلاٹر ہاؤس 1960 کی دہائی سے قائم ہے، جبکہ اس وقت یوگوسلاویہ کی جانب سے بھی اس منصوبے میں سرمایہ کاری کی گئی تھی، لیکن یہ منصوبہ وقت کے ساتھ اپنی افادیت اور ضروریات پوری کرنے میں ناکام ہو چکا ہے۔ ایسے ناکام اور پرانے منصوبے پر دوبارہ قومی خزانے سے رقم خرچ کرنا ملکی وسائل کو ضائع کرنے کے مترادف ہے۔ حکومت کو ناکام منصوبے پر دوبارہ پیسہ لگانے کے بجائے اسلام آباد کی ضروریات کے مطابق نیا اور مستقل سلاٹر ہاؤس تعمیر کرنا چاہیے۔

مرکزی صدر نے کہا کہ جدید سلاٹر ہاؤس فوڈ سیفٹی، حلال گوشت، جانوروں کے طبی معائنے، حفظانِ صحت، گوشت کے معیار اور ماحولیاتی تحفظ کے لیے انتہائی ضروری ہے۔ اسلام آباد میں گوشت کے کاروبار سے وابستہ جمعیت القریش میٹ ویلفیئر ایسوسی ایشن کے عہدیداران کے لیے شہر کی حدود میں جدید، مستقل اور اسٹیٹ آف دی آرٹ سلاٹر ہاؤس وقت کی اہم ضرورت ہے۔

خورشید احمد قریشی نے وفاقی وزیر داخلہ سے مطالبہ کیا کہ وہ اسلام آباد کے سلاٹر ہاؤس کے معاملے کا فوری نوٹس لیں اور سی ڈی اے کو پابند کریں کہ کسی پرانے اور ناکام منصوبے پر دوبارہ قومی خزانے سے رقم خرچ کرنے کے بجائے I-11/4 میں جدید، مستقل اور اسٹیٹ آف دی آرٹ سلاٹر ہاؤس کی تعمیر کے لیے عملی اقدامات کیے جائیں۔

جمعیت القریش میٹ ویلفیئر ایسوسی ایشن نے واضح کیا کہ اسلام آباد کے سلاٹر ہاؤس کے حوالے سے اصل اسٹیک ہولڈرز کو نظرانداز کرکے کوئی بھی فیصلہ قابلِ قبول نہیں ہوگا۔ جمیعت القریش میٹ ویلفیئر ایسوسی ایشن I-11/4 میں جدید سلاٹر ہاؤس کے قیام کے اپنے دیرینہ مطالبے سے کسی صورت دستبردار نہیں ہوگی اور اس معاملے کو ہر متعلقہ فورم پر بھرپور انداز میں اٹھاتی رہے گی۔