میر رضا کیس میں غلطیاں ہوئیں،آئی جی سندھ کا بڑا اعتراف

آئی جی سندھ جاویدعالم اوڈھو کا کہنا ہے کہ میررضا کیس میں غلطیاں ہوئیں اب ہم نے ازالہ کردیا ہے،نئی کمیٹی بنادی گئی ہے۔

کراچی میں وکلا سے خطاب کرتے ہوئے کہا کہ میررضا کیس میں سب سے غلطیاں اور غلط فہمیاں ہوئیں۔ پولیس نے غلطی کی ہے تو میڈیکو لیگل افسر نے بھی غلطی کی لیکن اب ہم نے اس کا ازالہ کیا۔ نئی کمیٹی بنائی ہے جس پر مقتول کے والدین کو بھی اعتماد ہے۔ نئی ٹیم مکمل آزاد ہے اس پر کوئی دباؤ نہیں۔

دوسری جانب میر رضا کے والد کا پرانی تحقیقاتی ٹیم کو شامل تفتیش کرنے کا مطالبہ کردیا۔ کہا اللہ کرے نئی تحقیقاتی ٹیم پہلے جیسی نہ ہو۔ پرانی تحقیقاتی ٹیم نے ہمارے 11 روز ضائع کیے، اُسے شامل تفتیش کرنا چاہیے۔ پولیس تحقیقات پر اب تک مکمل بھروسہ قائم نہیں ہوسکا۔

رضا کے والد نے مزید کہا کہ ڈی ایس پی آفریدی میری بیٹی سے میررضا کی ڈیجیٹل واچ لیکر گئے اُن سے پوچھ گچھ کرنی چاہیے۔ ایس ایچ اوفیروز آباد، ایس ایچ اوگلستان جوہر سے پوچھ گچھ کی جائے، حکومت اورپولیس نے کیس کارخ بدلنےکی کوشش کی، تمام ثبوت نئی تحقیقاتی ٹیم کو دے دیئے ہیں۔