حکومت واضح کرے کہ اسلام آباد میں بلدیاتی انتخابات کرائے گی یا نہیں، چیئرمین عوام دوست گروپ

اسلام آباد (صداۓ سچ نیوز) وفاقی حکومت واضح کرے کہ الیکشن کمیشن پاکستان کی طرف سے حالیہ اعلان کردہ بلدیاتی انتخابات 2026، دسمبر میں وفاقی دارالحکومت میں کرائے گی یا نہیں؟ کیوں کہ ماضی میں حلقہ بندیوں اور بلدیاتی ڈھانچے میں تبدیلیوں کے بہانے چار مرتبہ انتخابات ملتوی کئے گئے، جس سے عوام میں غیر یقینی کی صورتحال پائی جا رہی ہے۔

ان خیالات کا اظہار تنویر حسین عباسی چیئرمین عوام دوست گروپ نے نور پور شاہاں بری امام میں اہل علاقہ سے گفتگو کرتے ہوئے کیا ۔ انہوں نے افسوس کا اظہار کیا کہ اشرافیہ کی نمائندہ جمہوری حکومتوں نے ہمیشہ نچلی سطح پر انتخابات کی منتقلی کے راستے میں رکاوٹیں کھڑی کیں، جو پارلیمنٹ میں جمہوریت کا راگ الاپتے تھکتی نہیں تھی۔

جبکہ فوجی آمروں نے بلدیاتی انتخابات کرا کے اختیارات کی نچلی سطح پر منتقلی کی کوششیں کیں۔ انہوں نے کہا کہ موجودہ پارلمینٹ عوام کے جمہوری اور بنیادی حقوق کو تحفظ دینے میں بری طرح ناکام رہی ہے۔ اس کے برعکس جمہوری آزادیوں کو محدود کرنے میں غیر جمہوری کردار ادا کیا ۔

تنویر عباسی نے کہا کہ بلدیاتی انتخابات آئینی ضرورت ہے جس کا اعلان الیکشن کمیشن پاکستان بار بار کر رہا ہے لیکن مفاد پرست حکمران ٹولہ وسائل اور اختیارات عوام کو نچلی سطح پر منتقل کرنے کو تیار نہیں ۔ انہوں نے کہا کہ حکومت کو بلدیاتی نظام کی راہ میں رکاوٹیں کھڑی کر کے آئینی انحراف نہیں کرنا چاہیے، کیونکہ آئین وطنِ عزیز کی سلامتی کی بنیادی دستاویز ہے۔