ایک عام عادت جو جوڑوں کے امراض کا شکار بنا دیتی ہے

جب جوڑوں کی صحت کی بات ہو تو نیند کا خیال کسی کو نہیں آتا۔

ڈاکٹروں کی جانب سے جسمانی وزن کو کنٹرول میں رکھنے، ورزش اور انجری سے بچنے کی تاکید کی جاتی ہے۔

مگر اب ایک نئی تحقیق میں دریافت کیا گیا کہ نیند اور جوڑوں کی صحت کے درمیان بہت مضبوط تعلق موجود ہے۔

جرنل arthritis کیئر اینڈ ریسرچ میں شائع تحقیق میں لگ بھگ 5 ہزار افراد کے ڈیٹا کا تجزیہ کیا گیا۔

تحقیق میں دریافت ہوا کہ نیند کی کمی، بے خوابی یا نائٹ شفٹ سے جوڑوں کے تکلیف دہ امراض اوسٹیو ارتھرائٹس (او اے) کا خطرہ بڑھ جاتا ہے۔

اوسٹیو ارتھرائٹس کا سامنا اس وقت ہوتا ہے جب جوڑوں کے درمیان موجود نرم ہڈی کارٹلیج عمر بڑھنے کے ساتھ تنزلی کا شکار ہو جاتی ہے جس کی متعدد وجوہات ہوسکتی ہیں۔

اس تحقیق میں دیکھا گیا تھا کہ جسم کی اندرونی گھڑی متاثر ہونے سے جوڑوں کی صحت پر کیا اثرات مرتب ہوتے ہیں۔

کارٹلیج روزمرہ کی بنیادوں پر دباؤ اور ریکوری کے عمل سے گزرتی ہے، یعنی دن بھر میں وزن برداشت کرتی ہے جبکہ رات کو اس کی بحالی ہوتی ہے۔

اس ہڈی کو بنانے والے خلیات کی اپنی اندرونی گھڑی ہوتی ہے جو مرمت کے اس عمل میں معاونت فراہم کرتے ہیں۔

اس تحقیق میں جن افراد کی نیند کی عادات جیسے دورانیے، بے خوابی، نیند کی کمی یا دیگر کی تفصیلات حاصل کی گئیں۔

اس کے بعد 8 سے 13 سال کے عرصے میں دیکھا گیا کہ کتنے افراد کے گھٹنوں اور کولہوں کے جوڑوں کو مسائل کا سامنا ہوا۔

نتائج سے معلوم ہوا کہ جو افراد ہر رات 6 گھنٹے سے کم وقت تک سوتے ہیں، ان میں گھٹنوں کے جوڑوں کی تکلیف کا خطرہ 41 فیصد تک بڑھ جاتا ہے۔

اسی طرح ایسے افراد میں کولہوں کے جوڑوں کے مسائل کا خطرہ 39 فیصد تک بڑھ جاتا ہے۔

تحقیق کے مطابق جن افراد کو سونے میں مشکلات کا سامنا ہوتا ہے یا بار بار جاگتے ہیں، ان میں جوڑوں کے امراض کا خطرہ 34 سے 40 فیصد تک بڑھ جاتا ہے۔

نائٹ شفٹ میں کام کرنے والے افراد میں گھٹنوں کے جوڑوں کے مسائل کا خطرہ زیادہ ہوتا ہے۔