حیدرآباد، پتاشہ گلی میں قدیم علم پاک کو کچرا کنڈی بنانے کے خلاف عزادار رابطہ کمیٹی کا سخت قانونی کارروائی کا مطالبہ

حیدرآباد (صداۓ سچ نیوز) کسی بھی مسلک کی مذہبی مقدسات کی توہین نہ صرف دوسروں کی دل آزاری بلکہ توہینِ مذہب ہے جس کے خلاف فی الفور سخت سے سخت قانونی کارروائی عمل میں لاکر توہینِ مذہب کے مرتکب افراد کو سخت سزائیں دی جائیں۔

یہ مطالبہ عزادار رابطہ کمیٹی حیدرآباد کے سرپرست زوار عبدالستار درس، چیف آرگنائیزر علی گوہر چانڈیو، سٹی آرگنائیزر جام شمشاد علی جوکھیو، مشاورتی کاؤنسل کے رکن زاہد شریف شیخ و دیگر نے اپنے جاری کردہ بیان میں کیا۔

انہوں نے کہا کہ پتاشہ گلی فقیر کا پڑ میں کھمبھاٹیوں کے پڑ کا علم پاک حیدرآباد شہر کا قدیم ترین پڑ اور علم پاک ہے جس کے منتظمین کو حیدرآباد میں ہونے والے لسانی فسادات میں نقل مکانی کرجانے پر مجبور ہونا پڑا تھا، تاہم اس وقت سے تاحال اس پڑ کے منتظمین ایامِ عزا میں پڑ پر آکر صفائی وغیرہ کرکے علم پاک کو دوبارہ سجاکر وہاں سے سالانہ سیج مبارک کا قدیم ماتمی جلوس برآمد کرکے سالانہ عزاداری کا اہتمام کرتے ہیں لیکن ایامِ عزا کے گذرتے ہی علاقہ کے چند جانے پہچانے فتنہ پرور شرپسند لوگ اس مقدس مقام کو دوبارہ کچرہ کنڈی میں تبدیل کرکے مذہبی کشیدگی پھیلانے والی شرمناک سازش میں مصروف ہوجاتے ہیں۔ انہوں نے میئر حیدرآباد اور متعلقہ یو سی چیئرمین سے اس مقدس مقام کی فی الفور صفائی کے انتظامات کو ممکن بنانے کا مطالبہ کیا ہے۔

عزادار رابطہ کمیٹی حیدرآباد کے رہنماؤں نے آئی جی سندھ، ڈی آئی جی حیدرآباد، ایس ایس پی حیدرآباد اور جملہ قانون نافذ کرنے والے اداروں کے ذمہ داران سے ایسے مذہبی کشیدگی پھیلانے والے شرپسندوں کے خلاف فی الفور سخت قانونی کارروائی عمل میں لانے کا پرزور مطالبہ کیا ہے۔