کراچی میں نامعلوم ملزم کی فائرنگ سے سابق ایس ایچ او جاوید ابڑو جاں بحق

کراچی (صداۓ سچ نیوز) کراچی کے علاقے گلشنِ حدید میں نامعلوم ملزم کی فائرنگ سے سابق ایس ایچ او اسٹیل ٹاؤن جاوید ابڑو جاں بحق اور اہلیہ زخمی ہوگئیں۔ مقتول کے بھائی کو بھی کچھ عرصہ قبل قتل کیا گیا تھا۔

سابق ایس ایچ او اسٹیل ٹاؤن جاوید ابڑو اپنی اہلیہ کے ساتھ گھر کے باہر بیٹھے تھے کہ نامعلوم ملزم پیدل چلتے ہوئے آیا، اندھا دھند گولیاں چلائیں اور باآسانی فرار بھی ہوگیا۔ واقعے میں جاوید ابڑو کی اہلیہ بھی زخمی ہوئیں۔

پولیس کے مطابق مقتول کو سات گولیاں لگیں، جائے وقوعہ سے شواہد جمع کرلیے گئے، اہل خانہ کے مطابق مقتول کے بھائی محمد خان ابڑو کو بھی کچھ عرصہ قبل ٹارگٹ کرکے قتل کیا گیا تھا۔

واقعے کی اطلاع ملتے ہی کراچی پولیس چیف آزاد خان جناح اسپتال پہنچے، کہا ملزم جلد قانون کی گرفت میں ہوگا۔