لوٹن میں KIDS OR کے ڈونرز کے اعزاز میں ڈاکٹر طاہر لون کا افطار ڈنر

لوٹن (نامہ نگار) برطانیہ کی معروف بین الاقوامی چیریٹی KIDS OR سے منسلک ڈاکٹر طاہر لون کی جانب سے لوٹن میں ایک پروقار افطار ڈنر کا اہتمام کیا گیا جس کا مقصد اُن ڈونرز اور مخیر حضرات کو خراجِ تحسین پیش کرنا تھا جنہوں نے آزاد کشمیر کے ضلع کوٹلی کے ڈسٹرکٹ ہیڈکوارٹر اسپتال میں بچوں کے لیے علیحدہ آپریشن روم/یونٹ کے قیام میں بھرپور مالی اور اخلاقی تعاون فراہم کیا۔

تقریب میں ممبران پارلیمنٹ، ہاؤس آف لارڈز کے ارکان، بیڈفورڈ پولیس کے آفیسرز، ڈاکٹرز، علمائے کرام، مقامی کونسلرز، کمیونٹی لیڈرز، سیاسی، سماجی، مذہبی، تجارتی اور صحافتی حلقوں سے تعلق رکھنے والی ممتاز شخصیات سمیت تقریباً ساڑھے تین سو افراد نے شرکت کی

ڈاکٹر طاہر محمود لون نے اپنے خطاب میں تمام ڈونرز، معاونین اور رضاکاروں کا فرداً فرداً شکریہ ادا کیا۔

اس تقریب کی ایک خاص بات یہ بھی تھی کہ اس میں کسی قسم کی ڈونیشن اپیل یا چندہ مہم نہیں چلائی گئی بلکہ یہ مکمل طور پر اُن ڈونرز کے اعزاز میں منعقد کی گئی تھی جنہوں نے پہلے ہی اس منصوبے کے لیے بھرپور تعاون فراہم کیا تھا۔

شرکاء نے اس کامیاب اور باوقار تقریب کو نہ صرف ایک اہم فلاحی منصوبے کی تکمیل کا جشن قرار دیا بلکہ اسے انسانیت کی خدمت، باہمی تعاون اور سماجی ذمہ داری کے جذبے کی ایک بہترین مثال بھی قرار دیا جبکہ تقریب میں ڈپٹی مئیر لوٹن Cllr Shahanara Naser نے تمام مہمانوں کا شکریہ ادا کیا