ٹیکسلا میں یتیم بچی سے مبینہ زیادتی کی کوشش، ملزم فرار، مقدمہ درج

ٹیکسلا (صداۓ سچ نیوز) ٹیکسلا کے علاقے گھڑی افغاناں میں ایک یتیم بچی کے ساتھ مبینہ زیادتی کی کوشش کا افسوسناک واقعہ پیش آیا، جہاں شور مچانے پر نامعلوم نوجوان موقع سے فرار ہونے میں کامیاب ہوگیا۔

ذرائع کے مطابق متاثرہ بچی نے بروقت 15 پر کال کرکے پولیس کو واقعے کی اطلاع دی، جس کے بعد پولیس موقع پر پہنچ گئی۔ متاثرہ بچی کی درخواست پر نامعلوم ملزم کے خلاف مقدمہ درج کرلیا گیا ہے۔

پولیس نے واقعے کی تحقیقات کا آغاز کرتے ہوئے ملزم کی شناخت اور گرفتاری کے لیے کارروائی شروع کردی ہے، جبکہ مختلف پہلوؤں سے تفتیش جاری ہے۔

اہل علاقہ نے پولیس کے اعلیٰ حکام سے مطالبہ کیا ہے کہ معصوم بچی کے ساتھ پیش آنے والے مبینہ واقعے کا فوری نوٹس لیتے ہوئے ملزم کو جلد گرفتار کرکے قانون کے مطابق سخت کارروائی عمل میں لائی جائے اور متاثرہ خاندان کو مکمل تحفظ فراہم کیا جائے۔