صومالی قزاقوں کے ہاتھوں 11 پاکستانی یرغمال، اہلِ خانہ کی وزیراعظم اور فیلڈ مارشل سے فوری مدد کی اپیل

موغادیشو (صداۓ سچ نیوز) صومالی بحری قزاقوں کے ہاتھوں یرغمال  11 پاکستانیوں کے خاندانوں نے حکومت سے فوری مدد کی اپیل کی ہے۔

ذرائع کے مطابق یرغمالیوں میں کراچی سے تعلق رکھنے والے سید حسین یوسف، کاشف عمر، یاسر خان اور امین بن شمس بھی شامل ہیں۔ اہلِ خانہ کا کہنا ہے کہ 21 اپریل کے بعد سے ان سے کسی قسم کا رابطہ نہیں ہو سکا۔

متاثرہ خاندانوں کے مطابق جہاز کے مالک نے مبینہ طور پر تاوان ادا کرنے سے انکار کر دیا ہے، جس کے باعث صورتحال مزید پیچیدہ ہو گئی ہے۔

یرغمالیوں کے اہلِ خانہ نے وزیراعظم اور فیلڈ مارشل سے اپیل کی ہے کہ ہنگامی بنیادوں پر اقدامات کیے جائیں اور ان کے پیاروں کی بحفاظت واپسی کو یقینی بنایا جائے۔

یہ بھی پڑھیں: خطے میں شرمناک ناکامی کے بعد امریکا نیا محاذ کھول رہا ہے،ایرانی سپریم لیڈر

اہلیہ یاسر خان نے مطالبہ کیا کہ حکومت فوری مداخلت کرے، جبکہ کاشف عمر کی اہلیہ نے یرغمالیوں کی بازیابی کے لیے خصوصی کمیٹی تشکیل دینے اور ایک فوکل پرسن مقرر کرنے کا مطالبہ کیا ہے، جو متاثرہ خاندانوں سے مسلسل رابطے میں رہے۔

خاندانوں کا کہنا ہے کہ ان کے پیاروں کی محفوظ واپسی ہی ان کی اولین ترجیح ہے اور حکومت کو اس معاملے کو سنجیدگی سے لینا چاہیے۔