آئی جی اسلام آباد کے احکامات پر تھانہ کرپا کا CUST یونیورسٹی میں منشیات آگاہی سیشن

اسلام آباد (صدائے سچ نیوز) انسپکٹر جنرل آف پولیس اسلام آباد کے خصوصی احکامات کی روشنی میں تھانہ کرپا کے ایس ایچ او ذوالفقار علی کی جانب سے CUST یونیورسٹی میں زیرِ تعلیم طلبہ کے لیے منشیات کے خلاف آگاہی سیشن کا انعقاد کیا گیا۔

آگاہی سیشن کے دوران ایس ایچ او ذوالفقار علی نے طلبہ کو منشیات کے استعمال سے پیدا ہونے والے جسمانی، ذہنی، سماجی اور تعلیمی نقصانات سے تفصیلی طور پر آگاہ کیا۔ انہوں نے کہا کہ منشیات نوجوان نسل کے روشن مستقبل کو داؤ پر لگا دیتی ہیں اور یہ ناسور پورے معاشرے کے لیے ایک سنگین خطرہ بن چکا ہے۔

ایس ایچ او تھانہ کرپا کا کہنا تھا کہ اسلام آباد پولیس نوجوانوں کو منشیات کی لعنت سے محفوظ رکھنے کے لیے تعلیمی اداروں میں تسلسل کے ساتھ آگاہی مہم جاری رکھے ہوئے ہے، تاکہ طلبہ مثبت سوچ، صحت مند طرزِ زندگی اور ذمہ دار شہری بن سکیں۔

یہ بھی پڑھیں: سچ میں دہشتگردی کا خاتمہ کرنا ہے تو آ کر ہمارے ساتھ پالیسی بنائیں ، سہیل آفریدی

اس موقع پر طلبہ نے اسلام آباد پولیس کے اس اقدام کو سراہتے ہوئے کہا کہ ایسی آگاہی سرگرمیاں نوجوانوں کو منفی رجحانات سے بچانے اور درست راستہ اختیار کرنے میں اہم کردار ادا کرتی ہیں۔

آخر میں اسلام آباد پولیس کی جانب سے والدین اور تعلیمی اداروں سے اپیل کی گئی کہ وہ منشیات کے خلاف اس مشترکہ جدوجہد میں پولیس کا بھرپور ساتھ دیں تاکہ ایک محفوظ اور صحت مند معاشرہ تشکیل دیا جا سکے۔