وفاقی سرکاری ملازمین کیلئے کیپیٹل سمارٹ سٹی میں 2 ہزار کنال پر ہاؤسنگ اسکیم، ہاوسنگ اتھارٹی کا معاہدہ طے پا گیا

اسلام آباد (صدائے سچ نیوز) فیڈرل گورنمنٹ ایمپلائز ہاؤسنگ اتھارٹی اور فیوچر ڈویلپمنٹ ہولڈنگز پرائیویٹ لمیٹڈ کے درمیان شراکت داری، کیپٹل سمارٹ سٹی کے حدود میں واقع 2000 کنال زمین پر جدید ہاؤسنگ اسکیم تشکیل دی جائے گی۔

فیڈرل گورنمنٹ ایمپلائز ہاؤسنگ اتھارٹی نے اپنے جوائنٹ وینچر پروجیکٹس ونگ (JVP) کے تحت ضلع راولپنڈی کے اہم ترین علاقے میں ہاؤسنگ اسکیم کے لیے معاہدے کی یادداشت (MoU) پر دستخط کی تقریب کا انعقاد کیا۔ یہ تقریب فیڈرل گورنمنٹ ایمپلائز ہاؤسنگ اتھارٹی ہیڈ آفس میں منعقد ہوئی۔ اس موقع پر وفاقی ملازمین اور شہریوں کے لیے رہائشی سہولیات کی فراہمی کے سلسلے میں اہم ہاؤسنگ منصوبوں کے لیے شراکت دار ادارےکے ساتھ باضابطہ ایم او یوسائن کیا گیا۔

اس ایم او یو کے تحت فیڈرل گورنمنٹ ایمپلائز ہاؤسنگ اتھارٹی اور فیوچر ڈویلپمنٹ ہولڈنگز پرائیویٹ لمیٹڈ کے درمیان شراکت داری کا آغاز کیا گیا ہے۔ اس معاہدے کے تحت تحصیل و ضلع راولپنڈی میں کیپٹل سمارٹ سٹی کے حدود میں واقع 2000 کنال زمین پر جدید ہاؤسنگ اسکیم تشکیل دی جائے گی۔ یہ پروجیکٹ "لینڈ شیئرنگ ماڈل” (Land Sharing Model) کے تحت تیار کیا جائے گا۔

تقریب میں FDHL کے ایگزیکٹو ڈائریکٹر برگیڈیئر (ریٹائرڈ) محمد ندیم اسلم اور ایف جی ای ایچ اے کے اعلیٰ حکام نے شرکت کی۔ اتھارٹی حکام کا کہنا تھا کہ اس شراکت داری سے وفاقی ملازمین اور عام شہریوں کو عالمی معیار کی جدید رہائشی سہولیات کی بروقت اور شفاف فراہمی ممکن ہو سکے گی۔

ڈی جی ہاوسنگ اتھارٹی کیپٹن (ر) ظفر اقبال کا کہنا تھا کہ کیپیٹل سمارٹ سٹی ایک جدید، خوبصورت اور بہترین طرزِ زندگی کا حامل منصوبہ ہے، جہاں رہائش کے ساتھ ساتھ زندگی کی تمام بنیادی اور جدید سہولیات کو ایک ہی جگہ فراہم کرنے پر خصوصی توجہ دی گئی ہے۔ یہاں معیاری سکولز، کمیونٹی سینٹرز، مساجد، پارکس، کھیلوں کی سہولیات، کمرشل ایریاز، صحت کی سہولیات اور دیگر بے شمار ضروریاتِ زندگی موجود ہیں۔ کشادہ سڑکیں، خوبصورت گرین بیلٹس، منظم انفراسٹرکچر اور جدید شہری سہولیات اسے ایک مثالی رہائشی منصوبہ بناتی ہیں۔ مختصراً، کیپیٹل سمارٹ سٹی صرف ایک ہاؤسنگ سوسائٹی نہیں بلکہ ایک ایسا مکمل اور جدید شہر ہے جہاں خاندان کو آرام، سہولت، تفریح اور بہتر مستقبل سب کچھ ایک ہی جگہ میسر آتا ہے۔

اس موقع پر ہاؤسنگ اتھارٹی کی جانب سے چیف انجینیئر سید محمد حسن اور کی جانب سے ایگزیکٹو ڈائریکٹر برگیڈیئر (ریٹائرڈ) محمد ندیم اسلم نےمعاہدے کی مفاہمتی یادداشت پر دستخط کیے۔

ہاؤسنگ اتھارٹی کے ترجمان کے مطابق اس منصوبے کی بدولت ضلع راولپنڈی اور گردونواح کے وفاقی ملازمین کو بااعتماد، محفوظ اور جدید سہولیات سے آراستہ رہائش گاہیں فراہم کی جا سکیں گی۔مفاہمتی یادداشت وفاقی سرکاری ملازمین کے لیے جدید رہائشی منصوبوں کی ترقی کے نئے مرحلے کا آغاز ہیں۔ FGEHA کی جانب سے نجی شعبے کے ساتھ اس شراکت داری کا مقصد دستیاب وسائل کو مؤثر انداز میں بروئے کار لاتے ہوئے معیاری، منظم اور جدید رہائشی سہولیات کی فراہمی کو یقینی بنانا ہے۔

اس موقع پر خطاب کرتے ہوئے ڈی جی (FGEHA)کیپٹن (ر) محمد ظفر اقبال نے مزید کہا کہ یہ منصوبہ سرکاری ملازمین کے لیے سستی اور معیاری رہائش کے خواب کو حقیقت میں بدلنے کی ایک بڑی پیش رفت ہے۔ یہ معاہدہ وفاقی حکومت کے رہائشی منصوبوں کو پبلک پرائیویٹ پارٹنرشپ کے ماڈل پر آگے بڑھانے کے عزم کی ایک روشن مثال ہے۔

مزید یہ کہ ڈائریکٹر جنرل ہاوسنگ اتھارٹی کیپٹن (ر) محمد ظفر اقبال نے اجلاس کے دوران بتایا کہ اتھارٹی نے وفاقی سرکاری ملازمین کے لیے رہائشی سہولیات کی فراہمی کے سلسلے میں نمایاں پیش رفت کی ہے۔ اسلام آباد اور کراچی میں مختلف رہائشی منصوبے کامیابی سے مکمل کیے جا چکے ہیں جبکہ کئی منصوبے تکمیل کے آخری مراحل میں ہیں۔

ان کا مزید کہنا تھا کہ وفاقی وزیر اور سیکریٹری ہاؤ سنگ کی ترجیح ہے کہ سرکاری ملازمین کو محفوظ، معیاری اور سستی رہائش فراہم کی جائے۔ انہوں نے ہدایت کی کہ ترقیاتی منصوبوں کی بروقت تکمیل کو یقینی بنایا جائے اور شفافیت کو اولین ترجیح دی جائے۔ ڈی جی FGEHA نے یقین دہانی کرائی کہ اتھارٹی اپنے تمام جاری منصوبے مقررہ مدت میں مکمل کرے گی اور رہائشی سہولیات کو عالمی معیار کے مطابق بہتر بنائے گی۔