دنیا اتنے واضح جرم کے سامنے آخر کیسے خاموش رہ سکتی ہے؟ 168 بچوں کی شہادت کے 168 دن مکمل ہونے پر ایرانی سفیر کا بیان

ماسکو (صداۓ سچ نیوز) روس میں ایران کے سفیر کاظم جلالی نے ایران کے شہر میناب میں اسکول پر امریکی حملے میں 168 طلبہ اور عملے کے افراد کے قتل پر عالمی اداروں کی 168 روزہ خاموشی پر شدید تنقید کی ہے۔

کاظم جلالی نے اپنے ایکس اکاؤنٹ پر لکھا کہ اس المناک واقعے کو گزرے 168 دن ہو چکے ہیں، لیکن کیلنڈر آج بھی خون آلود اعداد و شمار کی گواہی دے رہا ہے، ہر گزرتا دن ایک نئے زخم کی علامت ہے اور یہ میناب کے ان 168 معصوم بچوں کی یاد دلاتا ہے جن کے خواب ٹوماہاک میزائلوں کی تباہ کاری کے باعث خاک میں مل گئے۔

ایرانی سفیر نے کہا کہ یہ 168 دن ان 168 بچوں کی خاموش مگر زندہ چیخیں ہیں، جن کی جانب عالمی اداروں اور حکومتوں نے تاریخ کے اس سیاہ دن پر آنکھیں بند کر رکھی ہیں۔

انہوں نے سوال اٹھایا کہ دنیا اتنے واضح جرم کے سامنے آخر کیسے خاموش رہ سکتی ہے؟ میناب اسکول پر حملے نے امریکی انسانی حقوق کے دعوؤں میں بچوں کے قتل کی حقیقت کو بے نقاب کر دیا ہے۔