مرکزی جماعتِ اہلِسنت برطانیہ کے سرپرستِ پیر سید عبدالقادر شاہ جیلانی کا لندن میں انتقال، اناللہ واناعلیہ راجعون

لندن ( صدائے سچ نیوز)مرکزی جماعتِ اہلِسنت برطانیہ کے سرپرستِ اعلی، مفکرِ اسلام، ممتاز عالمِ دین اور روحانی پیشوا ڈاکٹر پیر سید عبدالقادر شاہ جیلانی لندن میں انتقال کر گئے۔

مرحوم کا شمار برطانیہ میں اہلِ سنت و الجماعت کے اولین مبلغین اور بانی رہنماوں میں ہوتا تھا۔

انہوں نے اپنی پوری زندگی اہلِ سنت کے عقائد، تعلیمات اور فکر کے فروغ و دفاع کے لیے وقف کر دی، علمی و فکری محفلوں میں ان کی شخصیت کو گہری بصیرت، فصاحت و بلاغت اور جرات مندانہ موقف کے باعث نمایاں مقام حاصل تھا۔

ڈاکٹر پیر سید عبدالقادر شاہ جیلانی، حضرت پروفیسر پیر سید احمد حسین شاہ ترمذی کے قریبی رفیق تھے، دونوں شخصیات کے درمیان گہرا تعلق محبت، باہمی احترام اور خدمتِ دین پر مبنی تھا۔

مرحوم نے برطانیہ سمیت دنیا بھر میں اہلِ سنت کی تنظیموں، مدارس اور مشنری مراکز کے قیام میں کلیدی کردار ادا کیا، ان کے خطابات، مناظرے اور علمی تصانیف کو علمی و فکری دنیا میں قدر کی نگاہ سے دیکھا جاتا ہے۔

مرکزی جماعتِ اہلسنت کے سیکریٹری جنرل علامہ قاضی عبدالعزیز چشتی ایم بی ای، مرکزی ترجمان پیر سید انور حسین کاظمی، صاحبزادہ سید محمد حیدر ترمزی اور برطانیہ اور یورپ سے علما و مشائخ کی بڑی تعداد نے مرحوم کے داماد صدر جماعت اہلسنت سید مظہر حسین گیلانی، صاحبزادوں سید پیر شاہ گیلانی، سید نقیب شاہ گیلانی، سید انوار شاہ گیلانی اور سید علی امام گیلانی اور دیگر خاندان سے تعزیت کی ہے اور کہا ہے کہ بلاشبہ مرحوم کا شمار برطانیہ میں اہلِ یورپ کی سر زمین سے ایک بے مثال چمکتا سورج غروب ہو گیا، اللہ کریم مرحوم کے درجات بلند فرمائے۔ آمین