خیبر پختونخوا میں بارشوں اور سیلاب سے 14 افراد جاں بحق، 19 زخمی

پشاور (صداۓ سچ نیوز) خیبرپختونخوا میں 19 جولائی سے جاری مون سون بارشوں نے مختلف اضلاع میں تباہی مچا دی ہے۔

پی ڈی ایم اے کے مطابق بارشوں، فلیش فلڈ اور گھروں کی چھتیں و دیواریں گرنے کے مختلف واقعات میں 14 افراد جاں بحق اور 19 زخمی ہوئے ہیں، جبکہ درجنوں مکانات کو بھی نقصان پہنچا ہے۔ جاں بحق افراد میں 6 مرد، 6 بچے اور 2 خواتین شامل ہیں، جبکہ زخمیوں میں 11 مرد، 4 خواتین اور 4 بچے شامل ہیں۔

بارشوں اور فلیش فلڈ کے باعث مجموعی طور پر 28 مکانات متاثر ہوئے، جن میں 22 کو جزوی جبکہ 6 مکانات مکمل طور پر تباہ ہوگئے۔ یہ واقعات پشاور، نوشہرہ، خیبر، مردان، بونیر، باجوڑ، شانگلہ، صوابی، لوئر چترال، لوئر و اپر دیر، ایبٹ آباد، مانسہرہ، تورغر، کرم اور شمالی وزیرستان سمیت مختلف اضلاع میں پیش آئے۔

پی ڈی ایم اے کے مطابق ریسکیو 1122، ضلعی انتظامیہ اور دیگر متعلقہ ادارے متاثرہ علاقوں میں امدادی سرگرمیوں میں مصروف ہیں، جبکہ ضلعی انتظامیہ کو ریلیف آپریشن تیز کرنے اور متاثرین کو فوری امداد فراہم کرنے کی ہدایات جاری کی گئی ہیں۔

پی ڈی ایم اے نے شہریوں سے اپیل کی ہے کہ غیر ضروری سفر سے گریز کریں، حساس سیاحتی مقامات کا رخ نہ کریں اور سرکاری الرٹس و ایڈوائزریز پر عمل کریں۔