موبائل فون کمپنیزکی غیرمعیاری سروس، پی ٹی اے نے آپریٹرز کو 30 روز کی مہلت دیدی

موبائل کمپنیوں کی غیر معیاری سروس اور کوریج پر پی ٹی اے متحرک ہو گیا، آپریٹرز کو خامیاں دور کرنے کیلئے 30دن کی مہلت دے دی، گزشتہ چار برس میں تین ارب اکتالیس کروڑ روپے جرمانے عائد کیے گئے۔

ملک بھر میں موبائل سروس کے معیار اور کوریج میں بہتری کیلئے پی ٹی اے نے ریگولیٹری کارروائیاں تیز کردیں۔پی ٹی اے نے سروس میں خامیوں پر موبائل آپریٹرز کو 30 روز میں ضروری اقدامات کرنے اور خرابیوں کی وجوہات کا تعین کرکے اصلاحی پلان جمع کرانے کی ہدایت کردی۔

پی ٹی اے نے خبردار کیا ہے کہ خامیاں دور نہ کرنے والے آپریٹرز کے خلاف مزید سخت کارروائی کی جائے گی۔دستاویز کے مطابق گزشتہ چار برس کے دوران موبائل کمپنیوں کو تین ارب 41کروڑ روپے جرمانے عائد کیے گئے، جبکہ کوالٹی آف سروس اور کوریج کی خلاف ورزیوں پر 20وارننگ لیٹرز اور 86 شوکاز نوٹسز بھی جاری کیے گئے۔