بھارت نے مسلسل گیارہویں مرتبہ سلال ڈیم سے پانی چھوڑ دیا، فلڈ الرٹ جاری

نیو دہلی (صداۓ سچ نیوز) بھارت نے مسلسل گیارہویں مرتبہ سلال ڈیم سے پانی چھوڑ دیا۔

بھارت کی جانب سے مسلسل گیارہویں مرتبہ سلال ڈیم سے پانی چھوڑنے کے بعد پاکستان میں فلڈ الرٹ جاری کر دیا گیا ہے، ذرائع کے مطابق بھارت سے تقریباً 90 ہزار کیوسک پانی کا ریلہ پاکستان پہنچنے کا امکان ہے۔

ملک کے بیشتردریاؤں میں پانی کا بہاؤ معمول کےمطابق ہے،تاہم دریائے سندھ کے مختلف مقامات پر نچلے اوردرمیانے درجے کے سیلاب کی صورتحال برقرار ہے، جبکہ تربیلا اور منگلا ڈیم میں بھی پانی کی سطح میں اضافہ ریکارڈ کیا گیا ہے۔

دریائےسندھ میں سکھر بیراج پردرمیانے درجےکا سیلاب برقرار ہے،جبکہ کالا باغ،چشمہ اورگڈو بیراج پر نچلے درجےکی سیلابی صورتحال موجود ہے، دریائے راوی میں ہیڈ بلوکی پر بھی نچلے درجےکا سیلاب ریکارڈ کیا گیا ہے۔

دوسری جانب دریائےجہلم،چناب،ستلج، راوی اورکابل کےبیشتر اہم مقامات پرپانی کا بہاؤ معمول کے مطابق ہے، چاچڑان شریف اوربےنظیرپل کےمقام پرپانی کےبہاؤمیں کمی ریکارڈ کی گئی، جہاں اخراج دو لاکھ اٹھارہ ہزارنو سو اٹھہتر کیوسک رہا۔

تربیلاڈیم میں پانی کی سطح بڑھ کر 1,539 فٹ تک پہنچ گئی ہے اورڈیم 89 فیصد بھر چکا ہے،جو گزشتہ سال کےبرابر ہے،منگلا ڈیم میں پانی کی سطح 1,196 فٹ سے تجاوز کر گئی ہے، جبکہ ڈیم 57 فیصد بھر چکا ہے۔

متعلقہ اداروں نےدریاؤں اورنشیبی علاقوں کی صورتحال پر کڑی نظر رکھتے ہوئے ضلعی انتظامیہ اور ریسکیو اداروں کو الرٹ رہنے کی ہدایت کر دی ہے۔