میر رضا کا پہلا پوسٹ مارٹم کرنے والے ڈاکٹر اسامہ کو عہدے سے ہٹا دیا گیا

کراچی (صداۓ سچ نیوز) مقتول میر رضا کا پہلا پوسٹ مارٹم کرنے والے جناح اسپتال کے میڈیکو لیگل افسر ڈاکٹر اسامہ کو عہدے سے ہٹا دیا گیا۔

جان بوجھ کر شواہد چھپائے یا کسی کو بچانے کیلئے غلط رپورٹ بنائی؟ رپورٹ میں غلطی ہوئی یا سنگین غفلت؟ انکوائری کمیٹی کے سامنے کئی سوالوں کے جواب بھی دینا ہوں گے۔

میررضا کے فون اور اسمارٹ واچ کی انکوائری کیلئے ایف آئی اے اور این سی سی آئی اے سے معاونت لی جائے گی۔ تیزاب کی بوتلوں کا بھی کیمیکل ایگزامن کرایا جائے گا۔ ڈیجیٹل کرنسی کی منی ٹریل بھی حاصل کی جائے گی۔

حکام جناح اسپتال کے مطابق ڈاکٹر اسامہ کو مبینہ غفلت اور غلطیوں پر انکوائری کمیٹی میں پیشی بھگتنا پڑے گی، انکوائری کمیٹی پوسٹ مارٹم میں غلطیوں سے متعلق سوال کرے گی۔

میر رضا کا پہلا پوسٹ مارٹم ڈاکٹر اسامہ نے ہی کیا تھا اور غلطیوں سے بھری رپورٹ نے پورے کیس کو گمراہ کیا تھا، عدالتی حکم پر قبرکشائی کے بعد دوسری پوسٹ مارٹم رپورٹ میں حقائق سامنے آنے پر بننے والی نئی کمیٹی نے کیس کی ازسر نو تحقیقات شروع کر رکھی ہے۔

نئی ٹیم جائے وقوعہ سے ملنے والی تیزاب کی بوتلوں کا بھی کیمیکل ایگزامن کروائے گی، ڈیجیٹل کرنسی کی منی ٹریل بھی حاصل کی جائے گی۔ میررضا کے موبائل فون اور اسمارٹ واچ کی انکوائری میں معاونت کیلئے ایف آئی اے اور این سی سی آئی اے کو بھی شامل کرلیا گیا ہے۔

نیشنل سائبر کرائم انویسٹی گیشن ایجنسی کے مطابق میر رضا کے خلاف کوئی ڈیٹا موجود نہیں ہے۔ ڈیٹا کی فراہمی کیلئے این سی سی آئی اے کو ایس ایس پی انویسٹی گیشن کورنگی نے خط لکھا تھا۔ اسی حوالے سے پیش رفت کا جائزہ لینے میررضا کے والدین بھی این سی سی آئی اے دفترپہنچے۔